विकसित देशांची उत्पादकता (Cotton Production) ही भारताच्या तुलनेत कितीतरी पट अधिक आहे. या देशांमध्ये एकरी सुमारे ४० हजार झाडे बसतील अशा लागवड (Cotton Sowing) अंतर शिफारशी आहेत.

पारंपरिक पद्धतीत कपाशीमध्ये (Cotton) साडेतीन फूट (१०६.६८ सेमी) बाय एक फूट (३०.४८ से.मी.) लागवड अंतर राहते.

त्यानुसार एकरी १० हजार झाडे बसतात. मर व अन्य कारणांमुळे कमी झाल्यानं झाडांची संख्या सरासरी आठ हजार झाडे राहते. अतिसघन लागवड पद्धतीत एकरी झाडांची संख्या २९ हजार ठेवली जाणार आहे.

त्यासाठी दोन ओळींत ८० ते ९० सेंटिमीटर आणि दोन झाडांत १५ ते २० सेंटिमीटर अंतराची शिफारस केली आहे.

काही कारणामुळे या २९ हजारपैकी चार हजार झाडे मेली, तरी २५ हजार झाडे उत्पादनक्षम राहणार आहेत. त्यात एका झाडावर सरासरी दहा बोंड, प्रति बोंड चार ग्रॅम कापूस असा हिशेब धरला तरी एका झाडापासून ४० ग्रॅम कापसाचे उत्पादन होईल.

ही उत्पादकता एकरी सरासरी दहा क्‍विंटल पोहोचू शकते. सध्याच्या एकरी चार क्‍विंटल उत्पादनाच्या तुलनेत ती अडीचपट उत्पादन मिळू शकते.