Pune News : ‘‘पशुपालन व्यवसाय फायदेशीर करण्यासाठी माहिती तंत्रज्ञानाचा वापर आगामी काळात वाढणार आहे. या तंत्रज्ञानामुळे तांत्रिक माहिती थेट मोबाईलवर मिळणार आहे. त्यामुळे दूध उत्पादकास त्याचा लाभ होईल,’’ असे मत महात्मा फुले कृषी विद्यापीठाचे कुलगुरू डॉ. प्रशांतकुमार पाटील यांनी मांडले.

कास्ट कासम प्रकल्प, महात्मा फुले कृषी विद्यापीठ (राहुरी) आणि देशी गाय संशोधन व प्रशिक्षण केंद्रातर्फे ‘पशूधन व्यवस्थापनात माहिती तंत्रज्ञानाचा (आयओटी) भारतीय परिस्थितीतील वापर’या विषयावर शुक्रवारी (ता.३) आयोजित एक दिवसीय कार्यशाळेच्या उद्‌घाटन प्रसंगी डॉ. पाटील बोलत होते. अध्यक्षस्थानी महाराष्ट्र राज्य गोसेवा आयोगाचे अध्यक्ष शेखर मुंदडा होते.

डॉ. पाटील म्हणाले,‘‘पशुपालनामध्ये सर्वसाधारपणे नोंदी नियमित न ठेवल्या जाणे, आरोग्य तपासणीमध्ये माहितीचा अभाव, चारा तसेच पशुखाद्याची पुरेशी माहिती नसणे, कुशल कामगारांचा अभाव, वातावरणातील होणारे विविध बदल याची तांत्रिक माहिती नसल्याने पशुपालकांचे आर्थिक नुकसान होत आहे.

यावर मात करण्यासाठी माहिती तंत्रज्ञानाचा वापर वाढणार आहे.’’ श्री. मुंदडा यांनी गोसंगोपन, गोसंवर्धन, गो-संरक्षण, गोमूल्यवर्धन, गोशाळा, गोरक्षण आणि गोआधारित शेतीबाबत आपले विचार मांडले.

या प्रसंगी बाएफ संस्थेचे अध्यक्ष डॉ. भरत काकडे, विशाल वशिष्ठ, व्ही. एस. श्रीधर, अभयसिंह जगताप, श्रीकृष्ण मुळे आणि शैलेश मदने यांनी मार्गदर्शन केले. डॉ. सुनील कदम यांनी कास्ट कासम प्रकल्पात सुरू असलेल्या संशोधनाविषयी माहिती दिली.

कृषी महाविद्यालयाचे सहयोगी अधिष्ठाता डॉ. सुनील मासाळकर यांनी स्वागत केले. डॉ. धीरज कणखरे यांनी सूत्रसंचालन केले. प्रमुख शास्त्रज्ञ डॉ. सोमनाथ माने यांनी आभार मानले.