अमरावती : लम्पी स्कीन आजाराच्या(Lumpy Skin Disease) विळख्यातून जिल्ह्यातील दोन हजारांवर जनावरे मुक्त झाली असून आजारी असलेली बहुतांश जनावरे उपचाराला (Lumpy Vaccination) प्रतिसाद देत आहेत. अनेक पशुपालकांकडून होणारी हेळसांड पशुसंवर्धन (Department of Animal Husbandry) विभागाची डोकेदुखी बनली आहे.

विशेष म्हणजे जिल्ह्यात दररोज २० ते २२ हजार जनावरांचे लसीकरण केले जात आहे. चिखलदरा, धारणी तसेच अचलपूर या तीन तालुक्यांत लम्पी स्कीनचा फैलाव झाल्याने प्रशासनसुद्धा चिंतेत सापडले.

पशुसंवर्धन विभागाच्या आकडेवारीनुसार जिल्ह्यात चार हजार १६९ जनावरे लम्पी स्कीनने पीडित झाली होती. त्यापैकी २ हजार ८० जनावरे लम्पी स्कीन आजारातून मुक्त झाली आहे.

राज्य शासनाच्या निर्णयानुसार आतापर्यंत ९ पशुपालकांच्या खात्यांमध्ये मदतीचे धनादेश जमा करण्यात आले आहे. दुधाळ जनावर मृत्युमुखी पडल्यास पशुपालकाला ३० हजार, बैलासाठी २५ हजार

तर वासरू किंवा लहान पशुसाठी १६ हजारांची आर्थिक मदत दिली जाणार आहे. १४ तालुक्यांत १६८ अधिकारी व कर्मचाऱ्यांची टीम तयार केली आहेत.जिल्ह्यात दोन हजारांपेक्षा अधिक जनावरे लम्पी स्कीनने मुक्त झाली

असून उर्वरित जनावरे उपचाराला प्रतिसाद देताहेत. आतापर्यंत ३ लाख २५ हजार ८४० जनावरांचे लसीकरण पूर्ण झाले असून या आठवड्यात ७० हजार लसीकरणाचे लक्ष्य पूर्ण करण्याचा प्रयत्न राहील.

- डॉ. पुरुषोत्तम सोळंके,

जिल्हा पशुसंवर्धन अधिकारी