Nagpur News : ‘‘राज्यात शेतीपूरक पोल्ट्री व्यवसाय करणाऱ्यांना व्यावसायिक दराने वीजपुरवठा केला जातो. परिणामी, विजेवर मोठा खर्च होत आहे. त्यामुळे कुक्‍कुटपालकांना कृषिपंपाप्रमाणे सवलतीच्या दरात वीजपुरवठा करण्याबाबत ऊर्जा विभागाला विनंती करून त्यामाध्यमातून ‘महावितरण’ला निर्देश द्यावेत,’’ अशी मागणी पशुसंवर्धन आयुक्‍त हेमंत वसेकर यांनी कृषी, पशुसंवर्धन, दुग्ध व्यवसाय विकास व मत्स्य व्यवसाय विकास विभागाच्या सचिवांकडे केली.

पशुसंवर्धन आयुक्‍तांच्या पत्रानुसार, पोल्ट्री व्यवसायिकांच्या समस्या सोडविण्यासाठी समन्वय समितीचे गठण पशुसंवर्धनमंत्री राधाकृष्ण विखे-पाटील यांच्या सूचनेवरून करण्यात आले आहे. या समितीच्या आजवर २५ जानेवारी, १३ एप्रिल आणि १५ जून रोजी बैठका झाल्या.

यात विविध पोल्ट्री क्षेत्रातील विविध समस्यांसोबतच वीज दराबाबतचा मुद्दाही सातत्याने मांडण्यात आला आहे. कंत्राटी आणि वैयक्‍तिक स्तरावर पोल्ट्री व्यवसाय करणाऱ्या शेतकऱ्यांची संख्या राज्यात मोठी आहे. या शेतकऱ्यांकडून व्यावसायिक दराने वीज देयक आकारणी होते. परिणामी, त्यांना नुकसान सोसावे लागत आहे.

दरम्यान, या पार्श्‍वभूमीवर कृषिपंपाच्या दरानुसार विद्युत दर आकारणीबाबत पोल्ट्री व्यवसायिकांची मागणी आहे. ती लक्षात घेता यापूर्वी शासनास प्रस्ताव सादर केला होता. मात्र त्यावर कोणताही निर्णय अद्याप झालेला नाही. पशुपालकांच्या मागणीनुसार वीज देयक दरात दिलासा देण्यासाठी शासनाच्या ऊर्जा विभागास विनंती करून याबाबत ‘महावितरण’ला निर्देश द्यावेत, अशी मागणी करण्यात आली.