Sangli News : कोरोना, लम्पी स्कीन या प्रमुख आजारांच्या कारणामुळे जत दुय्यम बाजार आवारात तब्बल पाच वर्षे बंद असलेला जनावरांचा बाजार नवीन वर्षात बाजार समितीने पुन्हा सुरू केला आहे.

शेतकऱ्यांसाठी बाजार पुन्हा सुरू केला असून त्याचा शेतकऱ्यांना फायदा घ्यावा, असे आवाहन बाजार समितीचे सभापती सुजय शिंदे यांनी केले. सांगली कृषी उत्पन्न बाजार समितीच्या जत येथील डफळे दुय्यम बाजार आवार येथे अनेक वर्षापासून लहान व मोठ्या जनावरांची विक्री केली जात होती.

दर गुरुवारी भरणाऱ्या बाजारात लाखो रुपयांची उलाढाल होत होती. तालुक्यासह लगत असलेल्या तालुके, गावांना मोठा फायदा होत होता या बाजारामुळे शेतकऱ्यांची सोय झाली होती. जनावरांत आलेल्या लम्पी स्कीन आणि कोरोना या आजारांमुळे २०१९ पासून हा बाजार पूर्णपणे बंद होता.

त्यामुळे शेतकऱ्यांची गैरसोय झाली होती. हा बाजार पुन्हा सुरू करण्याचा निर्णय बाजार समिती प्रशासनाने घेतला असून त्यानुसार नवीन वर्षाच्या पहिल्या दिवसापासून बाजार भरविण्यात आला.

सभापती शिंदे म्हणाले, ‘‘कोरोना, ‘लम्पी स्कीन’मुळे गेली पाच वर्षे बाजार बंद होता. शेतकऱ्यांच्या गैरसोयीचा विचार करून बाजार पुन्हा सुरू केला आहे. शेतकऱ्यांना पाण्यासह अन्य सोयीसुविधा निर्माण करण्यात येत आहेत.’’