सध्या थंडीचा कडाका वाढलेला आहे काही भागात ढगाळ वातावरण आहे. परिणामी या काळात कांदा व लसूण पिकांवर करपा (Wilt) रोगांचा प्रादुर्भाव होण्याची शक्यता असते. कांदा पिकावर करपा रोगाचा प्रादुर्भाव झाल्यास पुढील लक्षणे दिसून येतात. करपा रोगाचे दोन प्रकार असतात.

जांभळा करपा

रोगकारक बुरशी ः अल्टरनेरिया पोराय

पानावर सुरवातीला लांबट पांढुरके चट्टे पडतात. चट्ट्यांच्या मधला भाग आधी जांभळा व नंतर काळा पडतो. असे अनेक चट्टे एकमेकांत मिसळून पाने करपतात. रोपांच्या माना मऊ पडतात. ढगाळ वातावरणात या रोगाची तीव्रता वाढते. रांगडा कांद्यावर तसेच बीजोत्पादनासाठी लावलेल्या कांदा पिकावर आणि लसूण पिकावरही या रोगाचा प्रादुर्भाव होतो.

तपकिरी करपा :

रोगकारक बुरशी ः स्टेमफिलीयम व्हेसिकॅरिय

या रोगाचा प्रादुर्भाव रब्बी कांदा व लसूण पिकासह, बीजोत्पादनासाठीच्या कांदा पिकावर दिसून येतो. पिवळसर, तपकिरी रंगाचे लांबट चट्टे पानाच्या बाहेरील भागावर दिसून येतात. चट्ट्यांचा आकार वाढत जाऊन पाने सुकू लागतात. फुलांच्या दांड्यावर हा रोग आल्यास फुलांचे दांडे मऊ होऊन, वाकून मोडून पडतात. या रोगाचा प्रसार प्रामुख्याने रब्बी हंगामात होतो.