Pune News: गेल्या काही वर्षांपासून कृषी विभागाकडे मुलींचा पाहण्याचा दृष्टिकोन बदलला आहे. कृषीचे शिक्षण घेतल्यानंतर कृषी क्षेत्राकडे अनेक महिला वळत आहे. त्यामुळे राज्याच्या कृषी विभागात काम करणाऱ्या महिला वर्गाचा टक्का वाढला आहे. राज्यात इतर विभागांपैकी कृषी विभागात सर्वाधिक २८.८५ टक्के महिला काम करत असल्याने शेतकरी वर्गासाठी लोकाभिमुख असलेल्या योजना शेतकऱ्यांपर्यंत पोहोचण्यासाठी चांगलीच मदत होत आहे.

कृषी विभाग हा शेतकऱ्यांसाठी काम करणारा विभाग म्हणून ओळखला जातो. या विभागामार्फत शेतकऱ्यांसाठी विविध योजना राबविल्या जातात. त्या राबविण्यासाठी मोठ्या प्रमाणात अधिकारी, कर्मचारी आवश्यक आहे. सद्यःस्थितीत राज्यात एकूण १९ हजार २४० अशा पुरुष, महिला अधिकारी, कर्मचारी यांचा समावेश आहे. त्यापैकी ५ हजार ५५१ महिला कर्मचारी असून त्यांचा २८.८५ टक्का एवढा आहे. या विभागात महिला अधिकारी, कर्मचारी वर्गाचा टक्का वाढल्याचे बोलले जात आहे.

कृषी शिक्षण झाल्यानंतर एमपीएससीमार्फत, कृषी सेवकांच्या स्पर्धा परीक्षेच्या माध्यमातून कृषी विभागात रिक्त झालेल्या पदांवर निवड केली जात आहे. त्यामुळे कृषी विभागात महिलांचे प्रमाण वाढत आहे. निवड झाल्यानंतर गट अ वर्गामध्ये संचालक, सहसंचालक, एसएओ, उपसंचालक, गट ब वर्गामध्ये तालुका कृषी अधिकारी, तंत्र अधिकारी, कृषी अधिकारी, मंडळ कृषी अधिकारी, सहायक प्रशासकीय अधिकारी, गट क वर्गामध्ये कृषी सहायक, कृषी पर्यवेक्षक,

लिपिक, वरिष्ठ लिपिक, सहायक अधिकारी, लघुटंकलेखक, अनुरेखक, आरेखक तर गट ड वर्गामध्ये शिपाई, रोपमाळी मदतनीस, नाईक, मजूर अशा विविध पदांवर महिला सध्या काम करताना दिसत आहे. विशेष म्हणजे राज्यात गट क वर्गामध्ये महिला अधिकारी, कर्मचारी अधिकाऱ्यांची संख्या अधिक आहे. सुमारे चार हजार ७४९ महिला कर्मचारी असून, त्याची टक्केवारी ३० एवढी आहे.

त्यापाठोपाठ गट ब वर्गामध्ये ४७६, तर गट ड वर्गामध्ये २५९, तर गट अ वर्गामध्ये ५७ महिला अधिकारी कार्यरत आहे. यातील अनेक महिला या कृषी विभागातील विविध योजनांमध्ये काम करत असून, काही महिला योजनेच्या अभ्यासक म्हणून ओळखल्या जाऊ लागल्या आहे.छत्रपती संभाजीनगर येथील जिल्हा अधीक्षक कृषी अधिकारी कार्यालयातील तंत्र अधिकारी निभा डाहाके म्हणाल्या, की मी कायम ‘शेतकरी प्रथम’ हा दृष्टिकोन ठेवून काम करत आले. शेतकऱ्यांना प्रत्यक्ष लाभ मिळेल, अशीच प्रत्येक योजना, उपक्रम राबवण्याचा माझा प्रयत्न असतो.

कृषी विभागात गट अ ते गट ड संवर्गामध्ये कार्यरत असलेल्या महिला

संवर्ग एकूण संख्या महिला अधिकारी-कर्मचारी टक्केवारी

गट अ ३८५ ५७ १४.८१

गट ब २४०० ४७६ १९.८३

गट क १५,४४३ ४७५९ ३०.८२

गट ड १०१२ २५९ २५.५९

एकूण १९,२४० ५५५१ २८.८५

कृषी विभागात विविध पदांवर कार्यरत महिला अधिकारी, कर्मचारी : उज्ज्वला बानखेले, अर्चना कडू, डॉ. विद्या मानकर, ऊर्मिला रजपूत, सुनंदा कुऱ्हाडे, पूनम खटावकर, प्रीती हिरळकर, भाग्यश्री फरांदे, मनाली तांबडे, सुप्रिया शिळीमकर, क्रांती चौधरी, कविता आंडगे, मनीषा तागड, छाया देशमुख, डॉ. प्रीती सावाईराम, अरुणा लांडे, अर्चना शिंदे, स्वाती हासे.