Beed News : खरीप, रब्बी ते उन्हाळी पिकावर वन्यप्राण्यांचा मोठा उपद्रव्य वाढला असल्याने गेवराई तालुक्यातील शेतकरी चांगलाच घायकुतीला आला आहे. ऊस, भुईमूग, बाजरी, ज्वारी आदी पिकांची वन्यप्राणी नासाडी करत असल्याने हतबल झालेल्या शेतकऱ्यांसमोर यावर काय उपाय करावा असा प्रश्‍न आहे.

गेवराई तालुक्यात खरीप-रब्बीसह उजवा व गोदावरी नदीच्या शेतशिवारात उन्हाळी पिकाबरोबरच मुख्य उसाचे क्षेत्र अधिकचे आहे. आधीच निसर्गाने मेटाकुटीस आलेल्या शेतकऱ्यांच्या ऊस, उन्हाळ्यातील भुईमूग, बाजरी आदी पिकांवर वन्यप्राण्यातील रानडुक्कर पिकाची मोठ्या प्रमाणावर नासधूस करत आहेत.

शेतकरी आपल्या परीने शक्य तो उपाय पिकांचा बचाव करण्यास करतो आहे. रात्री-बेरात्री शेतात जीव मुठीत धरून राखण करत आहेत. घरातील मुलाबाळांप्रमाणे शेतकरी कर्जाचे ओझे डोक्यावर घेत शेतीत वर्षभर केलेल्या कबाड कष्टातून मुलांचे शिक्षण, मुलीचे लग्न, वर्षभराचा घरखर्च शेतपिकाच्या उत्पन्नावर करतो. मात्र वन्यजीव पिके भुईसपाट करत असल्याने शेतकरी चांगलाच हवालदिल झाला आहे.

जीव मुठीत धरून करावी लागते जागल...

रात्री- बेरात्री वन्यप्राण्यातील रानडुक्करांचा गेवराई तालुक्यात उपद्रव्य मोठा वाढल्याने दहा ते पंधरा डुकरांचा कळप ऊस, भुईमूग, बाजरी तसेच भाजीपाला वर्गीय पिकाची नासाडी करत असल्याने रक्षण करण्यासाठी शेतकऱ्यांचे जीव धोक्यात आले आहेत.

तार कुंपण व झटका मशिनला शंभर टक्के अनुदानाची गरज

शेतकऱ्यांना समृद्ध करायचअसेल तर शेतकरी घेत असलेल्या पिकाचे रक्षण होण्यास शासनाकडून तार कुंपण आणि झटका मशिन यासाठी शंभर टक्के अनुदान द्यावे, अशी मागणी शेतकऱ्यांकडून होत आहे.