Solapur News : अक्कलकोट तालुक्यातील वागदरीसह परिसरातील शिरवळवाडी, सदलापूर, शिरवळ, बोरगाव, घोळसगाव, किरनळ्ळी, भुरीकवठे, गोगाव, खैराट या भागातील शेतात रानडुकरांनी धुमाकूळ घातला आहे. त्यामुळे शेतकऱ्यांचे मोठे नुकसान होत आहे.

रानडुकरे शेतात घुसून ऊस, पपई, केळी, मका, सोयाबीन, उडीद यांसारख्या उभ्या पिकांचे मोठ्या प्रमाणात नुकसान करत आहेत. यामुळे शेतकऱ्यांमध्ये भीतीचे आणि नैराश्याचे वातावरण पसरले आहे. शेतकरी रक्ताचे पाणी करून तळहाताच्या फोडाप्रमाणे पिकांना जपतो. त्यांचे संगोपन करत असतो.

बी- बियाणे, खते व कीटकनाशके यासाठी प्रचंड खर्च करून पिकांना वाढवत असतो. मात्र, रानडुकरांमुळे त्यांच्या कष्टावर पाणी फेरले जात आहे. रानडुकरांचा कळप शेतात घुसून एका रात्रीत पिकांची नासाडी करत आहेत. नगदी पिकांचे नुकसान झाल्यामुळे शेतकऱ्यांना फार मोठा आर्थिक फटका सहन करावा लागत आहे.

तरी संबंधित वनखात्याच्या अधिकाऱ्यांनी या रानडुकरांचा कायमचा बंदोबस्त करावा व शेतकऱ्यांना नुकसान भरपाई द्यावी, अशी मागणी या परिसरातील शेतकरी वर्गातून होत आहे. एकंदरीत, रानडुकरांमुळे होणारे नुकसान थांबवण्यासाठी तातडीने उपाययोजना करणे आवश्यक आहे, जेणेकरून शेतकऱ्यांचे नुकसान कमी होईल, असे मत तज्ज्ञ शेतकरी वर्गातून व्यक्त होत आहे.

रानडुकरांचे कळप शेतकऱ्यांसाठी डोकेदुखी

रानडुकरे किंवा जंगली डुकरे, ही भारतात आढळणारी एक वन्य डुक्कर प्रजाती आहे. ती सर्वभक्षी असून कंदमुळे, कीटक, साप आणि इतर लहान सस्तन प्राण्यांवर उपजीविका करतात. तसेच रानडुकरे साधारणपणे कळपाने राहतात आणि शेतातील उभ्या पिकांची नासाडी करतात. यांना अटकाव करण्याचा प्रयत्न केल्यास माणसांच्या अंगावर येतात. त्यासाठी रानडुकरांचे कळप शेतकऱ्यांसाठी डोकेदुखी ठरत आहे.