Washim News : तालुक्यात रब्बीच्या पेरण्यांना सुरुवात झाली आहे. यंदा पाण्याची उपलब्धता कमी असल्यामुळे गव्हाच्या लागवड क्षेत्रात घट होईल. रब्बी पिकाच्या पेरणीसाठी पोषक वातावरण तयार झाल्यामुळे पेरण्यांनी आता वेग घेतला आहे.

या वर्षी पावसात सरासरी तूट आहे. सुरुवातीपासूनच पाऊस हा अनियमित व लहरी स्वरूपाचा पडल्यामुळे पाणीपातळीत वाढ झाली नाही. पावसाअभावी व पिवळा मोझॅकमुळे खरिपातील सोयाबीनच्या उत्पादनात मोठी घट आली.

शेतकऱ्यांना मशागत व रब्बीची पेरणी कशी करावी, असा प्रश्‍न पडला आहे. त्यातच सोयाबीनचे भावही कमालीचे कमी झाले आहेत. तरी शेतकरी रब्बीच्या तयारीला लागला आहे.

परतीच्या पावसाने हुलकावणी दिल्यामुळे जमिनीतील ओलावा कमी होत असून, तुरीचे पिकही संकटात सापडण्याची शक्यता निर्माण झाली आहे. शेतातील ओलावा कमी होत असल्यामुळे शेतकऱ्यांची हरभरा पेरणीसाठी लगबग वाढली आहे. पाणी पातळीत वाढ झाली नसल्यामुळे गव्हाचा पेरा कमी होण्याची चिन्हे आहेत.

कोरडवाहू शेतकऱ्यांना तर रब्बीची आशाही धूसर झाली आहे. मागील तीन-चार दिवसांपासून वातावरणामध्ये मोठा बदल झाला असून रब्बी पिकांच्या पेरणीची लगबग वाढली आहे.

थंडीला सुरुवात झाली असली, तरी दिवसाच्या तापमानामध्ये प्रचंड वाढ झालेली आहे. या वर्षी पाणीसाठा कमी असल्यामुळे गव्हाऐवजी हरभरा, करडई, सूर्यफूल या पिकांच्या क्षेत्रात वाढ होणार, असे शेतकरी सांगत आहेत.