Solapur News : सोलापूर : महाराष्ट्र विधानसभेच्या सार्वत्रिक निवडणुकीसाठी प्रचार सध्या अंतिम टप्प्यात आहे. मतदानासाठी आवश्‍यक असलेली प्रशासकीय तयारी देखील अंतिम टप्प्यात आली आहे. विधानसभा निवडणुकीसाठी २० नोव्हेंबरला मतदान होणार आहे. मतदानाच्या दिवशी सोलापूर शहरातील सर्वच्या सर्व मतदान केंद्राचे वेबकास्टिंग होणार आहे.

ग्रामीण भागात त्या विधानसभा मतदारसंघातील ५० टक्के मतदान केंद्रावर वेबकास्टिंगची यंत्रणा असणार आहे. लोकसभा निवडणुकीत सोलापूर जिल्ह्यात मतदाना दरम्यान गैरप्रकार झाल्याचे समोर आले होते. त्यामध्येमाढा लोकसभा मतदारसंघातील सांगोल्यात ईव्हीएम पेटविण्याचा प्रयत्न झाला तर करमाळ्यात ईव्हीएमवर हातोडा मारण्यात आला होता. सोलापूर लोकसभा मतदारसंघात उत्तर सोलापूर तालुक्यात दुधात बोट बुडवून मतदान करण्यात आले.

लोकसभा निवडणुकीत कांद्याने ईव्हीएमचे बटण दाबण्याचाही प्रयत्न झाला होता. विधानसभा निवडणुकीत हे सर्व प्रकार टाळण्यासाठी मोठी खबरदारी घेण्यात आली आहे. या शिवाय मतदान केंद्रातील गैरप्रकारही टाळण्यास वेबकास्टिंगमुळे मदत होणार आहे. यंदाच्या विधानसभा निवडणुकीसाठी सोलापूर जिल्ह्यात एकूण ३८ लाख ४८ हजार ८६९ एवढे मतदार आहेत.

त्यामध्ये १९ लाख ७१ हजार ८३१ पुरुष तर १८ लाख ७६ हजार ७३८ महिला मतदार आहेत. इतर मतदार ३१० असून जिल्ह्यातील एकूण मतदारांची संख्या ३८ लाख ४८ हजार ८६९ एवढी आहे. सोलापूर जिल्हयामध्ये ३ हजार ७३८ एवढी मतदान केंद्र असून या मतदान केंद्रातून मतदानाची प्रक्रिया होणार आहे. जिल्ह्यात शहरी भागातील १ हजार १८३ व ग्रामीण भागातील २ हजार ५५५ मतदान केंद्र आहेत.

वेबकास्टिंग म्हणजे काय?

विधानसभेच्या मतदानासाठी वेबकास्टगसाठी निवडलेल्या मतदान केंद्रात मतदान गोपनियतेचा भंग होणार नाही, अशा पद्धतीने एक कॅमेरा असणार आहे. यामुळे त्या केंद्रावर मतदान सुरू होण्यापासून संपेपर्यंतच्या सर्व घडामोडींचे चित्रण होणार आहे. हे चित्रण थेट सहाय्यक निवडणूक निर्णय अधिकारी, निवडणूक निर्णय अधिकारी, राज्य निवडणूक आयोग, केंद्रीय निवडणूक आयोग यांना पाहता येणार आहे. यामुळे केंद्रावरील सोयी-सुविधा, कामकाज व केंद्रावरील हालचाली वरिष्ठ अधिकाऱ्यांना पाहता येणार आहे.

विधानसभानिहाय मतदान केंद्र „  

करमाळा : ................. ३४७ „  

माढा : ..................... ३५५ „  

बार्शी : .................... ३३३ „  

मोहोळ : ................... ३३६ „  

सोलापूर शहर उत्तर : ........ २८९ „  

सोलापूर शहर मध्य : ....... ३०४ „  

अक्कलकोट : ............. ३९६ „  

सोलापूर दक्षिण : ........... ३६७ „  

पंढरपूर : ................... ३५७ „  

सांगोला : .................. ३०९ „  

माळशिरस : ................ ३४५