Jalgaon News : खानदेशात सर्वत्र चांगला पाऊस झाला. परंतु यामुळे सिंचन प्रकल्पांतील जलसाठ्यात वाढ झाली आहे. जलसाठा स्थिर असून, ओलावा असल्याने पिकांच्या सिंचनाची कार्यवाही बंद आहे. यामुळे भूगर्भातील पाणी उपसा बंदावस्थेत आहे.

सध्या कूपनलिका, विहिरी व इतर कृत्रीम जलसाठ्यांमधून पिकांच्या सिंचनाची कार्यवाही अपवाद वगळता सुरू नाही. अर्थात पावसामुळे पाण्याची बचत झाली आहे. सतत जोरदार किंवा अतिजोरदार पाऊस काही भागात असल्याने सिंचन प्रकल्पांतील जलसाठ्यात वाढ झाली आहे.

खानदेशातील एकूण जलसाठ्यात मागील हंगामात हिवाळ्यात व पुढेही सतत घट झाली गोती. कारण ऑक्टोबरमध्ये पाऊस नव्हता. परतीचा पाऊस नसल्याने ऑक्टोबरच्या सुरुवातीलाच सिंचनाचे काम सुरू झाले. यामुळे कूपनलिका, विहिरी व इतर कृत्रीम जलसाठ्यांमधून पाण्याचा उपसा वेगात सुरू होता.

पण यंदा तशी स्थिती नाही. सध्या तापी नदीवरील हतनूर, वाघूर, गिरणा नदी प्रवाही आहे. पावसामुळे शेतीसंबंधीच्या पाण्याची बचत झाल्याचा मुद्दा शेतकरी उपस्थित करीत आहेत. कापूस, ऊस, ज्वारी, मका, केळी, भाजीपाला, फळ पिकांना सध्या काही दिवस सिंचनाची गरज नाही. कारण सर्वत्र पाऊस झाला आहे.

सतत पाऊस असल्याने ओलावा अधिक आहे. शेतकरी कोरडे, सूर्यप्रकाशित वातावरण असायला हवे, अशी प्रतीक्षा करीत आहेत. पाणीउपसा बंद असल्याने भूगर्भातील जलसाठा टिकून आहे. परतीचा पाऊस आल्यास पुढेही पाणीवापर कूपनलिका व विहिरींतून होणार नाही. यामुळे रब्बीतही पाण्याची सुरुवातीला गरज कमी राहील व कोरडवाहू पिकांची पेरणीही बऱ्यापैकी होईल, अशी स्थिती आहे.