Sangli News : मागील आठवड्यापासून सुरू झालेल्या ताकारी योजनेचे पाणी कडेगाव तालुक्यातील लाभक्षेत्राची तहान भागवून खानापूर तालुक्यातील कार्वेजवळून वाहत आहे. ऐन उन्हाळ्याच्या सुरुवातीलाच पाणी आल्याने शेतकऱ्यांतून आनंद व्यक्त होत आहे.

सोडलेले पाणी आवर्तन पूर्ण क्षमतेने आणि शेवटच्या शेतात पोहोचेपर्यंत सुरूच राहील, अशी खात्री कार्यकारी अभियंता राजन डवरी यांनी दिली. आठवड्यापूर्वी, ४ फेब्रुवारीला योजनेचे ९ पंप सुरू करून पाणी देण्यात आले होते.

सुरवातीच्या कडेगाव तालुक्यातील लाभक्षेत्राची तहान भागवून हे पाणी ३ दिवसांपासून खानापूर तालुक्यातील गावांतून वाहत आहे. सध्या या पाण्याने ८० किलोमीटरचा मुख्य कालवा पार केला आहे.

ताकारी लाभक्षेत्रातील पाणी मागणी विचारात घेऊन पाटबंधारे विभागाने ताकारी योजनेचे या वर्षीचे तिसरे व रब्बी हंगामातील दुसरे आवर्तन २२ जानेवारीला सुरू केले होते. परंतु सांगलीजवळ कृष्णा नदीपात्र उघडे पडून पाणीटंचाई निर्माण झाल्याने ताकारी व टेंभू योजनेचे निम्मे पंप बंद करण्यात आले होते.

यावर पर्याय निघताच ४ फेब्रुवारीला पुनश्चः पाणी सुरू झाले. सध्या योजनेचे दोन्ही टप्प्यांवरील ११ पंप सुरू करण्यात आले असून टप्पा ३ वरून ३ पंप आणि टप्पा ४ वरील २ पंप सुरू करून सोनहिरा खोऱ्यासह तडसर परिसरांत पाणी सोडण्यात आले आहे.