Yavatmal News : वाढत्या उन्हामुळे पाणी पातळीत झपाट्याने कमी येत आहे. त्यामुळे खासगी विहीर अधिग्रहणाचा आकडा ६८ वर पोचला आहे. अवघ्या आठ दिवसांत प्रशासनाच्या नोंदी ४७ खासगी विहीर अधिग्रहीत झाल्या आहेत. यावरून भीषण पाणीटंचाई निर्माण झाल्याचे स्पष्ट दिसत आहे.

तर जिल्ह्यातील बारा गावात टँकरने पाणी पुरवठा केल्या जात आहे. येत्या काही दिवसांत यात मोठ्या संख्येने वाढ होण्याची चिन्हे आहेत. गेल्या आठ ते दहा दिवसांपासून उन्हाची दाहकता कमालीची वाढली आहे. दरवर्षी साधारणतः एप्रिल महिन्यापासून पाणीटंचाईची झळ ग्रामीण भागातील नागरिकांना सहन करावी लागते. पावसाळ्यात सरासरीहून अधिक पाऊस कोसळल्यानंतरही उन्हाळ्याच्या सुरवातीलाच नदी, नाले, ओढे, छोटे तलाव कोरडे ठाक पडत आहेत.

त्याचप्रमाणे गावातील विहिरी, हातपंपसुद्धा कोरडे पडत असल्याने ग्रामस्थांचे टेन्शन वाढले आहे. पिण्याच्या पाण्यासाठी दारोदार भटकंती करण्याची वेळ येत आहे. यावर उपाययोजना म्हणून जिल्हा परिषद पाणी पुरवठा विभागाने पिण्याच्या पाण्यासाठी खासगी विहीर अधिग्रहण, टँकरची व्यवस्था केली आहे.

जिल्ह्यात आठ दिवसांपूर्वी सहा तालुक्यात २१ खासगी विहीर, तर सहा टँकर चालू करण्यात आले होते. परंतु अवघ्या आठच दिवसांत खासगी विहीर अधिग्रहण चक्क ६८ वर पोचले आहे. यामध्ये महागाव २६, पुसद १२, आर्णी १२, दिग्रस ७, वणी ५, दारव्हा ३, नेर, घाटंजी, झरीजामणी प्रत्येकी एक या प्रमाणे ६८ खासगी विहिरींचे अधिग्रहण करण्यात आले आहे. विशेष म्हणजे अवघ्या आठ दिवसांत ४७ खासगी विहिरींचे अधिग्रहण झाले आहे. भीषण पाणी टंचाई निर्माण झाल्याचे दिसून येत आहे.

पुसद आठ, तर आर्णीत चार टँकर

जिल्ह्यातील पुसद तालुक्यात मोठ्या प्रमाणात पाणीटंचाई भेडसावत आहे. आजघडीस पुसद तालुक्यात आठ, तर आर्णी तालुक्यात चार गावात टँकरने पाणीपुरवठा केल्या जात आहे. पुसद तालुक्यामध्ये बुटी ई, वडसद, रामपूर नगर, येलदरी, मधुकर नगर, शिवानगर, सिंगरवाडी, कारला तर आर्णी तालुक्यातील उमरीपठार, पाळोदी, सुधाकर नगर, चिमटा या चार गावांचा समावेश आहे.