ॲग्रोवन वृत्तसेवा

Tembhurni News : टेंभुर्णी : विठ्ठलराव शिंदे सहकारी साखर कारखान्याचे युनिट नंबर १ पिंपळनेर व युनिट नंबर २ करकंब कारखान्याचे २१ ते ३१ जानेवारीअखेर प्रति टन २८०० रुपयांप्रमाणे ऊसबिल शेतकऱ्यांच्या बॅंक खात्यात जमा करण्यात आले असून, १५ जानेवारीअखेर ऊस तोडणी वाहतूक बिले अदा करण्यात आली असल्याची माहिती साखर कारखान्याचे अध्यक्ष, माजी आमदार बबनराव शिंदे यांनी पत्रकार परिषदेत दिली.

अध्यक्ष शिंदे म्हणाले, की विठ्ठलराव शिंदे सहकारी साखर कारखान्याचे युनिट नंबर १ पिंपळनेर व युनिट नंबर २ करकंब येथील २०२४-२५ चा गाळप हंगाम सुरू आहे. या हंगामात युनिट नंबर १ येथे आजअखेर १० लाख ३८ हजार ७९४ टन ऊस गाळप झाले आहे. युनिट नंबर २ येथे आजअखेर ३ लाख ५२ हजार ४९५ टन उसाचे गाळप झालेले आहे.

दोन्ही युनिटचे मिळून आजअखेर १३ लाख ९१ हजार २८९ टन उसाचे गाळप झालेले आहे. या गळीत हंगामामध्ये युनिट नंबर १ पिंपळनेर व युनिट नंबर २ करकंबकडे २१ ते ३१ जानेवारी २०२५ या कालावधीत गाळपास आलेल्या १० दिवसाचे उसास प्रति टन २८०० रुपयांप्रमाणे पेमेंट शेतकऱ्यांच्या बँक खात्यात जमा करण्यात आले आहे. दहा दिवसाला व वेळेत पेमेंट देणाची परंपरा विठ्ठलराव शिंदे कारखान्याने कायम राखली आहे.

या ऊस बिलापोटी कारखान्याने ५७ कोटी ५७ लाख रुपये बँकेत जमा केले आहेत. या गाळप हंगामात कारखान्याने ऊस बिलासाठी ३४३ कोटी २१ लाख रुपये अदा केलेले आहेत. १ ते १५ जानेवारीअखेर ऊस तोडणी वाहतूक बिले अदा करण्यात आली असून, त्यापोटी कारखान्याने २२ कोटी ९८ लाख रुपये अदा केलेले आहेत.

१५ जानेवारीअखेर ऊस तोडणी वाहतूक बिलासाठी एकूण ७८ कोटी ६२ लाख रुपये अदा केलेले आहेत, अशी माहितीही अध्यक्ष शिंदे यांनी दिली. या वेळी साखर कारखान्याचे उपाध्यक्ष वामनराव उबाळे, कार्यकारी संचालक एस. एन. दिग्रजे, जनरल मॅनेजर एस. आर. यादव व इतर अधिकारी उपस्थित होते.