Pune News : जुन्नर : ‘‘श्री. विघ्नहर सहकारी साखर कारखान्याची संचालक मंडळाची बैठक नुकतीच झाली. त्यात गळीत हंगाम २०२५-२६ साठी पुरेसा ऊस उपलब्ध होण्यासाठी लागवड हंगाम २०२४-२५ मध्ये ऊस लागवडीचे धोरण १ जून पासून सुरू करण्याचे ठरविण्यात आले,’’ अशी माहिती विघ्नहर कारखान्याचे अध्यक्ष सत्यशील शेरकर यांनी दिली.

शेरकर म्हणाले, ‘‘आडसाली ऊस लागवडीसाठी १ जून ते ३१ ऑगस्ट २०२४ पर्यंतच्या कालावधीमध्ये ‘को. ८६०३२,’ ‘को.एम.०२६५’ या ऊस जातींच्या लागवडीस परवानगी देण्यात आली. पूर्वहंगामी लागवडीसाठी १ सप्टेंबर ते ३० नोव्हेंबर २०२४ पर्यंतचा कालावधी देण्यात आला असून त्यामध्ये ‘को. ८६०३२’, ‘को. एम.०२६५,’ ‘को. व्हीएसआय १८१२१’, व्हीएसआय ०८००५’ व ‘पीडीएन १५०१२’ या ऊस जातींच्या लागवडीस परवानगी दिली आहे.’’

‘‘सुरू हंगामासाठी १ डिसेंबर २०२४ पासून ‘को - ८६०३२’, ‘को-व्हीएसआय- १८१२१’, ‘पीडीएन-१५०१२’, ‘को- ९०५७’ व ‘व्हीएसआय-०८००५’ या, तर त्यातील डिसेंबर महिन्यात ‘कोएम-०२६५’ या ऊस जातीच्या लागवडीस परवानगी देण्यात आली आहे. त्यानुसार सभासद व ऊस उत्पादकांना १ जूनपासून ऊस जातीचे बेणे देण्यात येणार आहे,’’ असे शेरकर म्हणाले.

‘हुमणीचे भुंगेरे जमा करावेत’
‘‘हुमणी किडीचा प्रादुर्भाव टाळण्यासाठी शेतकरी व मजुरांकडून रोख रक्कम देऊन हुमणी किडीचे भुंगेरे गोळा करून कारखाना गट ऑफिसला जमा करून ते नष्ट केले जातात. सर्व ऊस उत्पादकांनी लागवड हंगाम २०२४-२५ मध्ये २५ मे ते ३० जून २०२४ या कालावधीत हुमणी किडीचे भुंगेरे गोळा करून कारखाना गट ऑफिसला जमा करावेत,’’ असे आवाहन शेरकर यांनी केले.