Akola News: जानेफळ (ता. मेहकर) येथील विदर्भ समृद्धी कृषी प्रोड्युसर कंपनीने शेतकऱ्यांसाठी सातत्याने केलेल्या कामांची दखल घेत पुण्यात आनंदी युनिव्हर्स फाउंडेशन आणि युवा महाराष्ट्र फाउंडेशन यांच्या संयुक्त विद्यमाने आयोजित कार्यक्रमात ‘महाराष्ट्र रत्न’ पुरस्काराने सन्मानित करण्यात आले.

या सन्मानाने कंपनीने शेतकरी केंद्रित कार्यात निर्माण केलेल्या विश्वासाचा आणि पारदर्शक व्यवस्थापनाचा गौरव करण्यात आला. हळद उत्पादक शेतकऱ्यांसाठी नव्याने उभारण्यात येत असलेल्या हळद प्रक्रिया प्रकल्पाची माहितीही याप्रसंगी देण्यात आली.

या प्रकल्पासाठी रुद्रायणी अॅग्रो इंडिया या कंपनीशी विपणन करार करण्यात आला असून, जानेफळ येथील हळद आता निर्यातीसाठी सज्ज होणार आहे.या कंपनीमार्फत शेतकऱ्यांना निर्यातक्षम हळद उत्पादनासाठी वेळोवेळी मार्गदर्शन दिले जाणार आहे.

हा पुरस्कार प्रदान सोहळ्यावेळी सुहास बळी, नितीन बळी, गणेश विटकर, तसेच विदर्भ समृद्धी कंपनीचे अध्यक्ष संतोष साखरे, उपाध्यक्ष मोहन प्रल्हाद धोटे, सचिव अमोल माडोकार, कार्यकारी संचालक मोहन जिवनराव धोटे, गजानन काळे यांच्यासह इतर संचालक आणि शेतकरी प्रतिनिधी मोठ्या संख्येने उपस्थित होते.