Parbhani News : वसंतराव नाईक मराठवाडा कृषी विद्यापीठाचा २६ वा दीक्षान्त समारंभ गुरुवारी (ता. २३) सकाळी १० वाजता विद्यापीठाच्या विद्यार्थी कल्याण अधिकारी कार्यालय परिसरातील सुवर्ण जयंती दीक्षान्त सभागृहात आयोजित करण्यात आला आहे.

दीक्षान्त समारंभाचे अध्यक्षस्थान राज्यपाल तथा विद्यापीठांचे कुलपती सी. पी. राधाकृष्णन हे भूषविणार आहेत. कृषिमंत्री तथा कृषी विद्यापीठांचे प्रतिकुलपती माणिकराव कोकाटे प्रमुख अतिथी म्हणून उपस्थित राहतील. खरगपूर येथील भारतीय तंत्रज्ञान संस्थेचे नामांकित कृषी अभियंता तथा माजी संचालक प्रा. वीरेंद्र कुमार तिवारी यांचे दीक्षान्त भाषण होणार आहे.

केंद्रीय रस्ते वाहतूक व महामार्गमंत्री नितीन गडकरी आणि जलसंपदा (गोदावरी व कृष्णा खोरे विकास महामंडळ) मंत्री राधाकृष्ण विखे पाटील यांना डॉक्टर ऑफ सायन्स (डी.एस्सी.) पदवी देऊन सन्मानित करण्यात येणार आहे. २०२३-२४ या शैक्षणिक वर्षातील विविध विद्याशाखांतील पदवी, पदव्युत्तर पदवी व आचार्य पदवी पूर्ण करणाऱ्या एकूण ३ हजार ४६२ स्नातकांना पदवी अनुग्रहित करण्यात येणार आहे, अशी माहिती कुलगुरू डॉ. इंद्र मणी यांनी गुरुवारी (ता. १६) पत्रकार परिषदेत दिली.

डॉ. इंद्र मणी म्हणाले, की दीक्षान्त समारंभास कृषी राज्यमंत्री आशिष जयस्वाल, आरोग्य व कुटुंब कल्याण, ऊर्जा, ग्रामीण पाणीपुरवठा व स्वच्छता, सार्वजनिक बांधकाम राज्यमंत्री मेघना बोर्डीकर, राज्य कृषी मूल्य आयोगाचे अध्यक्ष पाशा पटेल यांची उपस्थिती राहणार आहे. पदवी अनुग्रहित करण्यात येणाऱ्या स्नातकांची यादी विद्यापीठाच्या संकेतस्थळावर उपलब्ध करण्यात आली आहे.

दीक्षान्त समारंभाच्या यादीत नाव असणाऱ्या स्नातकांनीच कार्यक्रमास उपस्थित राहावे. इतर मान्यवरांना हा समारंभ विद्यापीठाच्या यू-ट्यूब https://www.youtube.com/@VNMKV यावर पाहता येईल. स्नातकांना समारंभानंतर पदवी प्रमाणपत्रे देण्यात येतील. उर्वरित स्नातकांना त्या दिवशी त्यांच्या संबंधित महाविद्यालयात पदवी प्रमाणपत्रे उपलब्ध करुन देण्यात येतील. पत्रकार परिषदेत शिक्षण संचालक डॉ. भगवान आसेवार, संशोधन संचालक डॉ. खिजर बेग, विस्तार शिक्षण संचालक डॉ. गिरधारी वाघमारे, कुलसचिव संतोष वेणीकर, उपकुलसचिव डॉ. गजानन भालेराव आदी उपस्थित होते.

स्नातकांना सुवर्ण पदके, पारितोषिके

दीक्षान्त समारंभात आचार्य पदवीचे २९ स्नातक, पदव्युत्तर पदवीचे ३०७ स्नातक व पदवी अभ्यासक्रमाचे ३ हजार १२६ स्नातकांचा समावेश आहे. एकूण ६० पदके आणि प्रमाणपत्रे वितरण करण्यात येणार आहेत. त्यात १४ विद्यापीठ सुवर्ण पदके, दात्यांकडून देण्यात येणारी १० सुवर्ण पदके, १ रौप्य पदक आणि ११ रोख पारितोषिकांचे वितरण करण्‍यात येणार आहे. २४ पदव्युत्तर पदवी गुणवत्‍ता प्रमाणपत्रांचा समावेश आहे.