Nagar News : नगरमधील पाथर्डी तालुक्यातील काही भागात शुक्रवारी (ता. २९) सायंकाळी अवकाळी पावसाने हजेरी लावली. या पावसाने अनेक आंब्याच्या झाडांचा मोहर, तसेच कैऱ्या गळाल्या.

काही ठिकाणी फळबागांनाही फटका बसला. तसेच मढी येथे सुरू असलेल्या यात्रेतील व्यापारी, भाविकांना त्रास सोसावा लागला.

जिल्ह्यात गेल्या दोन-तीन दिवसांपासून ढगाळ वातावरण आहे. शुक्रवारी (ता.२९) सायंकाळी पाथर्डी शहरासह तालुक्यातील निवडुंगे, मढी, तिसगाव, करंजी, टाकळी फाटा येथे अवकाळी पाऊस झाला.

जोराचा वारा सुटला. या पावसामुळे तिसगाव ते मढी रस्त्यावरील वाहतूक विस्कळीत झाली. या वादळ वाऱ्यामुळे या रस्त्याच्या लगत असलेली अनेक झाडे उन्मळून रस्त्यावर पडली. यामुळे मढीकडे जाणाऱ्या भाविकांच्या मार्गावर अडथळा निर्माण झाला, तर काही ठिकाणी वीजवाहक ताराही पडल्याने अनेक भागातील वीजपुरवठा खंडित झाला.

मढी येथे यात्रा सुरू आहे. देशभरातून भाविक चैतन्य कानिफनाथ महाराजांच्या समाधी दर्शनासाठी गर्दी करत आहे. कालच्या वादळी वाऱ्यासह झालेल्या पावसाचा मढीतील यात्रेकरू, व्यापारी, विक्रेत्यांना त्रास सोसावा लागला. शनिवारी (ता. ३०) दिवसभर काही भागात ढगाळ वातावरण राहिले.