Kolhapur News : जिल्ह्याला गुरुवारी (ता. १८) सलग दुसऱ्या दिवशी वळवाच्या पावसाने तडाखा दिला. दोन दिवसांपूर्वी जिल्ह्यातील पूर्व भागाला झोडपून काढलेल्या वळवाचा पावसाने गुरुवारी सर्वत्र पावसाने हजेरी लावली.

अचानक सुटलेल्या वाऱ्याने काही भागात झाडाच्या फांद्या तुटून पडल्या. शहरासह उपनगरांत वीजपुरवठा खंडित झाला. काही भागात झाडांची पडझड झाली, तर काही भागांत गारांचा पाऊस झाला.

बुधवारी (ता. १७) शिरोळ, जयसिंगपूर भागांत वळिवाने झोडपून काढले होते, तर हातकणंगले, करवीर, कागल तालुक्यांत झालेल्या पावसाने शेतकऱ्यांना ऊस पिकासाठी थोडासा दिलासा मिळाला.

सलग दोन दिवसांच्या पावसाने जिल्ह्यात अनेक ठिकाणी घरांचे, शेतीचे नुकसान झाले. चंदगड, कागल, गडहिंग्लज तालुक्यांतही समाधानकारक पाऊस झाला. मांडेदुर्ग येथे हनुमान विद्यालयासह एका घरावरील छप्पर उडून दुसऱ्या घरावर पडून नुकसान झाले.

रामपूर येथे एका घरावर झाड कोसळले. धुमडेवाडी फाट्यानजीक झाड कोसळून वाहतूक ठप्प झाली. माणगाव (ता. हातकणंगले) येथे वीज पडल्याने टॉवरने पेट घेतला. यामध्ये ४ लाख रुपयांचे नुकसान झाले.

उदगावला २५ घरे, शेडचे नुकसान

शिरोळ तालुक्यात बुधवारच्या पावसाचा सर्वाधिक फटका हा उदगावला बसला. यात ‘महावितरण’चे सुमारे २१ वीज खांब जमीनदोस्त झाले, तर ४० ठिकाणी विद्युत तारा तुटल्या. सुमारे २५ हून अधिक घरांचे व शेडचे नुकसान झाले. ग्रामविकास अधिकारी अनिल बिडकर यांच्याकडून पंचनामे सुरू केले आहेत, तर गावभागातील सुमारे १८ तास विद्युत पुरवठा खंडित होता.