Sangli News : वन्य प्राण्यांचा उपद्रव रोखण्यासाठी वन्य विभागामार्फत चर खोदण्याच्‍या कामास सुरुवात झाली असून, या कामामुळे वन्य प्राण्यांचा बंदोबस्त होऊन शेतकऱ्यांना दिलासा मिळेल, असे प्रतिपादन जिल्हा परिषदचे माजी सदस्य रणधीर नाईक यांनी केले.

बेलेवाडी, उपवळे (ता. शिराळा) येथे वन्य प्राण्यांचा उपद्रव रोखण्यासाठी वन्य विभाग हद्दीलगत चर खोदण्याचे काम सुरू असून, त्या कामाची पाहणी नाईक यांनी ग्रामस्थांसमवेत केली. रिळेचे सरपंच बाजीराव सपकाळ, वनपाल अनिल वाजे, बेलेवाडीचे सरपंच बजरंग जाधव व उपवळे सरपंच संभाजी पाटील यांची प्रमुख उपस्थिती होती.

नाईक म्हणाले, ‘‘चांदोली अभयारण्यामधून गवे व इतर वन्य प्राणी चाऱ्याच्‍या टंचाईमुळे जंगलाबाहेर पडल्यामुळे अनेक गावांत शेतीचे नुकसान मोठ्या प्रमाणावर होत आहे. अनेक ठिकाणी दोन-दोनशे एकर जमिनीचे क्षेत्र पडून राहिले आहे.नागरी वस्तीत वन्य प्राण्यांचे हल्ले करण्याचे प्रमाण वाढले आहे. हा उपद्रव रोखण्यासाठी शासनस्तरावर अनेक वेळा मोर्चे व ठिय्या आंदोलन झाले.

गतवर्षी शिराळा तहसील कार्यालयावर शेतकऱ्यांनी आंदोलन केले. वन्य प्राण्यांचा बंदोबस्त करण्यासाठी संबंधित विभागाकडून ठोस लेखी आश्वासन घेण्यात आले. तहसीलदारांच्या दालनात अधिकारी व आंदोलक शेतकरी यांच्यात बैठक झाली. पाठपुरावा करून प्रादेशिक वनविभागाने सरहद्दीने संरक्षण कुंपणाचा प्रस्ताव सादर करण्यात येईल.

अंदाजपत्रक जास्त रकमेचे झाले, वेळ लागत असेल तर प्राथमिक स्वरूपात चर मारून वन्य प्राणी खासगी क्षेत्रात येऊन नुकसान करत आहेत त्याचा बंदोबस्त करण्याचे अधिकाऱ्यांनी मान्य केले. त्यानुसार बेलेवाडी, रिळे, उपवळे, तडवळे येथे प्रत्येकी ३.२५ किलोमीटर अंतराची ३ मीटर रुंद व २ मीटर खोल चर मारण्याचे काम सुरू झाले आहे. शेतकऱ्यांचे वन्य प्राण्यांमुळे होणारे नुकसान थांबून दिलासा मिळण्यास मदत होणार आहे.