Washim News : पंजाबराव देशमुख नैसर्गिक शेती मिशनअंतर्गत नैसर्गिक शेती गटांचे दोन दिवसीय प्रशिक्षण स्थानिक कृषी तंत्रज्ञान व्यवस्थापन यंत्रणेमार्फत येथे घेण्यात आले होते. या वेळी आत्मा प्रकल्प संचालक अनिसा महाबळे, जिल्हा अधीक्षक कृषी अधिकारी आरिफ शाह, प्रकल्प उपसंचालक संतोष वाळके यांची प्रमुख उपस्थिती होती.

नैसर्गिक शेतीची, संकल्पना, उद्देश, महत्त्व आणि गरज याविषयी श्रीमती महाबळे यांनी मार्गदर्शन केले. डॉ. पंजाबराव देशमुख नैसर्गिक शेती मिशन २.० मार्गदर्शक सूचना कार्यपद्धती याविषयी श्री. वाळके यांनी मार्गदर्शन केले.

नैसर्गिक शेती पद्धतीनुसार पिकाचे अन्नद्रव्य व्यवस्थापन स्वनिर्मित सेंद्रिय पद्धतीची पीक वृद्धिवर्धक याविषयी श्री. शाह यांनी मार्गदर्शन केले. कार्बन क्रेडीट याविषयी कंपनी प्रतिनिधी प्रवीण कांबळे यांनी मार्गदर्शन केले.

दुसऱ्या दिवशीच्या सत्रात विविध पीक अवशेषांचे कम्पोस्ट खत बनविणे याविषयी सर्ग विकास समितीचे कुंवरसिंह मोहने यांनी मार्गदर्शन केले. पीक संरक्षण-पीक नियोजन, सापळा पिके, आंतरपीक लागवड, कीड-रोग निरिक्षण, निविष्ठा उत्पादन व वापर याविषयी शाह यांनी माहिती दिली.

कार्यक्रमाचे सूत्रसंचालन तालुका तंत्रज्ञान व्यवस्थापक जयप्रकाश लव्हाळे यांनी केले. कार्यक्रमासाठी सहाय्यक तंत्रज्ञान व्यवस्थापक विजय दुधे, सचिन इंगोले, रामेश्वर पाटील, संजय राऊत, संगणक आज्ञावली रूपरेषक गुलाम नबी शेख, कार्यालय सहाय्यक संदीप मोरे यांनी पुढाकार घेतला.