Kolhapur Jaggery News : कोल्हापूर जिल्हा मार्केट कमीटीत मागच्या काही दिवसांपासून गुळाचे सौदे सुरू झाले आहेत. दरम्यान आठवड्यातून तीन वेळा हे गुळाचे सौदे होतात जवळपास ५ हजार गूळ रव्यांचे सौदे होतात.

परंतु सौदे झालेल्या गूळ खरेदीची रक्कम १७ दिवसांतच द्यावी, अशी मागणी अडत्यांनी खरेदी व्यापाऱ्यांकडे केली. पण गूळ व्यापाऱ्यांनी महिनाझाले अडत्यांचे पैसे न दिल्याने शाहू मार्केट यार्डातील गूळ बाजारात जोरदार वाद झाला.

यामुळे पुढचे काही काळ वातावरण तणावपूर्ण बनले होते. यानंतर पुढचे काही तास गूळ सौदे बंद होते. यावर बाजार समितीने मध्यस्ती करत या वादावर पडदा टाकला. वाद मिटवल्यानंतर गूळ सौदे सुरू झाले.

दसरा झाला की कोल्हापूर जिल्ह्यात गुळाचा हंगाम सुरू होतो. मात्र, काही गुऱ्हाळघरे सुरू झाली आहेत. यामुळे आठवड्यातून काही दिवस गुळाचे सौदे होत असल्याने ४ ते ५ हजार गूळ रव्यांचे सौदे होत आहेत. गूळ अडत्याकडे आल्यावर वर्गीकरण करून गूळ सौद्याला लावतात.

या सौद्यात व्यापारी गूळ खरेदी करतात. त्याचे पैसे अडत्याला दिले जातात. अडते हेच पैसे शेतकऱ्यांना देतात. परंतु व्यापाऱ्यांनी अडत्यांना मागच्या ३० ते ४० दिवसांत पैसेच दिले नसल्याने अडत्यांनी शेतकऱ्यांचे पैसे थकवले यामुळे व्यापारी आणि अडते यांच्यात जोरदार वादावादीचे प्रकार पहायला मिळाले.

यंदाच्या हंगामासाठी अनेक शेतकरी अडत्यांकडे अनामत रक्कम मागत आहेत. ही बाब विचारात घेऊन अडत्यांनी खरेदीदार व्यापाऱ्यांनी खरेदी केलेल्या गुळाचे पैसे (उदारी रक्कम) तसेच या पुढील सौदे व्यवहारातील रक्कम १७ दिवसांत द्यावी, अशी अट घातली. त्याला व्यापाऱ्यांनी विरोध केला. काही व्यापाऱ्यांनी गुळाचे पैसे दीड दोन महिने होऊनही दिलेले नाहीत. त्यामुळे शेतकऱ्याला पैसे कोठून द्यावेत, असा प्रश्न अडत्यांनी केला. यातून वाद सुरू झाला आणि सौदे बंद पडले.

व्यापारी व अडते यांची बाजार समितीत बैठक घेण्यात आली. अडते व व्यापाऱ्यांत यापूर्वी ठरल्यानुसार पैशांची देवाण घेवाण व्हावी. यापुढील काळात किती दिवसात पैसे द्यावेत याबाबत स्वतंत्र बैठक घेऊन निर्णय घेऊ तसेच सौदे आज तातडीने सुरू करावेत, अशा सूचना सभापती भारत पाटील, सचिव जयवंत पाटील यांनी दिल्या. त्यानंतर सौदे पुन्हा सौदे सुरू झाले.