Solapur News : येडशी अभयारण्य आणि ढेंबरवाडी वनपरिक्षेत्रात चार दिवसांपासून वाघाला जेरबंद करण्यासाठी ताडोबा येथील टीम आणि वनविभागाने जोरदार मोहीम राबवली असताना, वाघाने आज (ता. १७) चकवा देत, बार्शी तालुक्यातील उक्कडगाव शिवारात हल्ला केला.

नामदेव ऊर्फ दादाराव गोविंद थोरात यांच्या ५० जनावरांच्या कळपावर हल्ला करून वाघाने दोन म्हशी आणि एका जर्सी कालवडीला ठार केले. ही घटना सायंकाळी पाचच्या सुमारास पठाडे तलावाजवळ घडली.

गेल्या एक महिन्यापासून बालाघाटाच्या पायथ्याशी येडशी आणि ढेंबरवाडी वनपरिक्षेत्रात वाघाने पाळीव जनावरांवर हल्ल्यांची मालिका सुरू ठेवली आहे.

मंगळवारी येडशी परिसरात एका गाईवर हल्ला करून तिला ठार केल्यानंतर ताडोबा टीमने वाघाला जेरबंद करण्यासाठी सर्व यंत्रणा कामाला लावली होती. ट्रॅप कॅमेऱ्यात वाघाचा वावर कैद झाल्यानंतर वनविभागाने हालचाली वेगाने सुरू केल्या.

येडशी अभयारण्य परिसरात तैनात असलेल्या धाराशिव, सोलापूर, लातूर, उदगीर, भूम, परंडा, सांगोला आणि मोहोळ येथील वनअधिकारी व कर्मचारी वाघाला पकडण्यासाठी सज्ज होते. मात्र, आज वाघाने उक्कडगाव शिवारात हल्ला करत परिसरात पुन्हा दहशत निर्माण केली.