Buldana News : ‘‘सिंचन संस्कृती तयार होत नाही तोपर्यंत आपण कितीही धरणे बांधली तरी काहीही होणार नाही. आज दुसरीकडे २५० मिलिमीटर पाऊस पडणाऱ्या आजनाळे गावात जलक्रांती होते हे आपण पाहतच आहोत. त्‍यामुळे सिंचन संस्कृती निर्माण केल्याशिवाय आपण समृद्ध होऊ शकणार नाही,’’ असे मत जलतज्ज्ञ सुधाकर चौधरी यांनी व्यक्त केले.

सिंदखेडराजा येथे जिजाऊ जन्मोत्सवानिमित्त कृषी विभाग, कृषी विज्ञान केंद्राच्या सहकार्याने ‘अभिता’ ॲग्रोतर्फे शुक्रवार (ता.१२) ते सोमवार (ता.१५) या काळात कृषी महोत्सव आयोजिला आहे.

याच्या उद्घाटनप्रसंगी चौधरी बोलत होते. भाऊसाहेब शेळके, ‘अभिता’चे व्यवस्थापकीय संचालक सुनील शेळके, ॲड. जयश्री शेळके, तसेच धिरेंद्रकुमार देसाई (गुजरात), सुखजितसिंग भंगू (पंजाब), प्रीतम सिंग (हरियाना), सुरेंद्र अवाना (राजस्थान), पांडुरंग पाटील (गोवा) आणि रवींद्र मेटकर (महाराष्ट्र) हे ‘आयसीआर’चे पुरस्कार विजेते शेतकरी उपस्थित होते.

सुनील शेळके म्हणाले, ‘‘शेतकऱ्यांना नवा दृष्टिकोन मिळावा, नव तंत्रज्ञान पाहता यावे, या हेतूने हे कृषिप्रदर्शन भरविले आहे. सिंदखेडराजा हे ऐतिहासिक शहर आहे. आपण जिजाऊ मासाहेबांचा इतिहास सांगताना, शिवाजी महाराजांचे कार्य आठवताना या महामानवांचे सिंचन, शेतीतील योगदान विसरता येणार नाही.

त्यांनी त्या काळात सिंचनासाठी तलाव उभारले होते. कृषी संस्कृतीत त्यांचे मोठे योगदान राहिले आहे. हा महोत्सव शेतकऱ्यांना निश्‍चितच दिशा देणारा ठरेल.’’

अवाना म्हणाले, ‘‘आपण नैसर्गिक शेती आणि थेट मार्केटिंग करतो. यामुळे आपले आठ ते दहापट उत्पन्न वाढले. शेतकऱ्याने शेतीसोबतच पशुपालन केले पाहिजे. यातून दररोज पैसा घरात येतो. जयपूर शहरात आपण ५०० कुटुंबांचा पारिवारिक शेतकरी बनलेलो आहे. ’’