Sangli News : जत तालुक्यासाठी महत्त्वाची ठरणाऱ्या विस्तारित म्हैसाळ योजनेच्या ६५ गावांची उर्वरित एक हजार कोटींची निविदा तातडीने काढावी. आता सरकारने आमचा अंत पाहू नये, अन्यथा यापुढचे आंदोलन आणखी तीव्र करू, असा इशारा जतचे माजी आमदार विलासराव जगताप यांनी दिला.

विस्तारित योजनेची निविदा काढावी, कार्यालय जत येथे व्हावे या प्रमुख मागणीसाठी मंगळवारी (ता. २०) जत तालुक्यात माजी आमदार विलासराव जगताप यांच्या नेतृत्वाखाली सर्वपक्षीयांनी तालुकाभर चक्काजाम आंदोलन केले. सकाळी नऊपासून आंदोलनाला सुरुवात झाली. या आंदोलनाला ६५ गावांसह तालुक्यात मोठा प्रतिसाद लाभला.

विलासराव जगताप, राष्ट्रवादीचे नेते सुरेशराव शिंदे यांच्यासह अनेक पदाधिकाऱ्यांना पोलिसांनी ताब्यात घेतले. या वेळी आंदोलकांनी जोरदार घोषणाबाजी केली. मूळ म्हैसाळ योजनेपासून वंचित असणारी ६५ गावे आणि टेंभू योजनेत चार गावांचा समावेश व्हावा यासाठी जत तालुक्यात गेल्या दोन महिन्यांपासून आंदोलन धुमसत आहे.

जगताप यांच्या नेतृत्वाखाली टप्प्याटप्याने आंदोलनाची धार वाढवण्यात येत आहे. तालुक्यात चक्काजाम करून सरकारचे या प्रश्नाकडे लक्ष वेधण्यात आले. विस्तारित योजनेचे काम जरी सरकारने सुरू केले असले तरी ते ज्या भागात पाणी आले आहे, तिथेच काम सुरू आहे.

वास्तविक दोन हजार कोटींची ही योजना आहे. यातील ९८१ कोटींची निविदा काढून कामाला सुरुवात केली आहे. परंतु मूळ वंचित ६५ गावांची निविदा, निधी आणि कामाला सुरुवात नाही. यामुळे शेतकरी, जनतेत प्रचंड असंतोष निर्माण झाला आहे. त्यामुळे आंदोलकांनी या उर्वरित कामाची निविदा काढून तातडीने काम सुरू करावे, अशी मागणी केली.

या वेळी मोठा पोलीस बंदोबस्त तैनात करण्यात आला होता. उमदी येथे पाणी संघर्ष समितीचे कार्यकर्ते, मन्सूर खतीब, दिग्विजय चव्हाण, आकाराम मासाळ, अभिजित चव्हाण यांच्यासह पदाधिकारी सहभागी झाले होते. संख येथे बुधवारी (ता. २१) तुकाराम बाबा महाराज यांनी ६५ गावांतील लोकांना एकत्र करत दिवसभर पाणी परिषदेचे आयोजन केले आहे.