Kolhapur News : ऊस दराबाबत आंदोलन करणाऱ्या संघटनांनी तसेच साखर कारखान्यांनी, ऊसदराबाबत सुवर्णमध्य साधून दोन दिवसांत तोडगा काढावा, या मध्ये शासनाने मध्यस्थीची भूमिका घेऊन ऊस उत्पादकांना न्याय द्यावा. दोन दिवसांत साखर कारखाने सुरू करावेत.

या कालावधीत साखर कारखाने सुरू न झाल्यास ज्या शेतकऱ्यांना ऊस कारखान्याला पाठवायचा आहे, त्या शेतकऱ्यांना शासनातर्फे पोलिस संरक्षण द्यावे. या वेळी आडवा येईल त्याला, त्यांच्या भाषेत उत्तर दिले जाईल, असा इशारा शेतकरी कृती समितीचे अध्यक्ष रामचंद्र डांगे यांनी मंगळवारी (ता. २१) येथे दिला.

शिरोळ व हातकणंगले तालुक्यातील ऊस उत्पादक, ऊस तोडणी मजूर, वाहनधारकांच्या वतीने ऊस दरावर तोडगा काढावा, या मागणीसाठी येथील तहसील कार्यालयासमोर धरणे आंदोलन सुरू करण्यात आले. या वेळी डांगे बोलत होते.

डांगे म्हणाले, ‘‘वेगवेगळ्या शेतकरी संघटनांनी मागील गळीत हंगामाचा ४०० रुपये व चालू हंगामाचे ३ हजार ५०० रुपयांचा पहिला हप्ता मिळावा, यासाठी गेली २१ दिवस साखर कारखाने बंद ठेवले आहेत. हातकणंगले व शिरोळ तालुक्यातील पाच साखर कारखाने बंद ठेवण्यात आले आहेत. यामुळे उत्पादकांचे मोठे नुकसान होत आहे.’’

ऊसदरप्रश्नी आज मुंबईत बैठक

राज्यात सुरू असलेल्या ऊस आंदोलनाबाबत तोडगा काढण्यासाठी आज (ता. २२) मंत्रालयात बैठक होणार आहे. सहकारमंत्री दिलीप वळसे-पाटील यांच्या अध्यक्षतेखाली सकाळी ११ वाजता ही बैठक होईल. वैद्यकीय शिक्षणमंत्री हसन मुश्रीफ यांच्यासह ‘स्वाभिमानी’चे नेते राजू शेट्टी, साखर संघाचे पदाधिकारी, साखर आयुक्त व साखर कारखानदार उपस्थित राहतील.