Solapur News : करमाळा तालुक्यातील शेतकऱ्यांनी उत्पादित केलेल्या केळीचा २० टनांचा पहिला कंटेनर रशियासाठी रवाना झाला असून, आखाती देशाबरोबरच अन्य देशांतही केळी निर्यात सुरू झाल्याने जिल्ह्यातील केळी उत्पादक शेतकऱ्यांच्या अशा पल्लवित झाल्या आहेत.

राज्य कृषी पणन मंडळ व मॅग्नेट प्रकल्प यांच्या पुढाकाराने के. डी. एक्स्पोर्ट कंदर यांच्या वतीने पहिला कंटेनर रशियासाठी रवाना करण्यात आला.

मुंबईच्या जवाहरलाल नेहरू पोर्ट ट्रस्ट (जेएनपीटी) येथे राज्याचे सहकार व पणन विभागाचे अतिरिक्त मुख्य सचिव राजगोपाल देवरा, जवाहरलाल नेहरू ट्रस्टचे अध्यक्ष उन्मेष वाघ यांच्या हस्ते या पहिल्या कंटेनरला झेंडा दाखविण्यात आला.

या वेळी केळी उत्पादक शेतकरी, निर्यातदार यांचा सन्मान करण्यात आला. या वेळी आशियन बँकेचे क्रिशेनसिंह रौतेला, मॅग्नेट प्रकल्पाचे सरव्यवस्थापक व प्रकल्प संचालक विनायक कोकरे, संजय कदम आदी उपस्थित होते.