Pune News : कुकडी प्रकल्पांतर्गत येणाऱ्या आंबेगाव तालुक्यातील डिंभे धरणातून (हुतात्मा बाबू गेनू जलाशय) उजवा कालव्याला गेल्या आठवड्यापासून पाणी सोडण्यात आले आहे. पाण्याचे हे आवर्तन साधारण एक महिना चालणार आहे. याचा आंबेगाव- शिरूर तालुक्यांतील सुमारे ६० गावांतील शेतीपिकांना फायदा होणार असून, याबद्दल शेतकऱ्यांनी समाधान व्यक्त केले.

आंबेगाव, शिरूर तालुक्यांतील अनेक गावांत पिण्याच्या पा़ण्याचा व शेतीच्या पाण्याचा प्रश्न भेडसावू लागला होता. याबाबत शेतकऱ्यांनी सहकारमंत्री दिलीप वळसे पाटील यांना कालव्याला पाणी सोडण्याबाबत निवेदन दिले होते. सध्या उन्हाचा तडाखा वाढला असून शेतकऱ्यांचा ऊस कारखान्याला जात आहे. त्यामुळे अनेक शेतकऱ्यांनी उसाच्या शेतात उन्हाळी नगदी पिके घेतली आहेत. उन्हाळी पिकांना पाण्याची गरज भासत आहे. उन्हाची तीव्रता दिवसेंदिवस वाढत चालल्याने काही ठिकाणी शेती पिकांनी माना टाकायला सुरुवात केली होती.

उजव्या कालव्याला नियमित पाणी सोडण्यात येत असल्याने शेतकऱ्यांच्या आर्थिक प्रगतीत डिंभा धरणाचा मोलाचा वाटा राहिला आहे. दरम्यान, पुण्यात उपमुख्यमंत्री तथा कुकडी प्रकल्प कालवा सल्लागार समितीचे अध्यक्ष अजित पवार यांच्या अध्यक्षतेखाली सहकारमंत्री वळसे पाटील यांच्या प्रमुख उपस्थितीत झालेल्या बैठकीत डिंभे धरण तसेच घोड व मीना शाखा कालव्यात उन्हाळी आवर्तन सोडण्याचा निर्णय घेण्यात आला. या वेळी बैठकीस भीमाशंकर कारखान्याचे अध्यक्ष बाळासाहेब बेंडे, कुकडी प्रकल्पाचे कार्यकारी अभियंता प्रशांत कडुसकर, वरिष्ठ अधिकारी दत्ता कोकणे यांच्यासह लोकप्रतिनिधी आणि अधिकारी उपस्थित होते.