Jalgaon Market : खानदेशात दर्जेदार केळीची आवक वाढत आहे. परंतु दरात मोठी वाढ सध्या नाही. काही भागांत दरात किंचित घटही दिसत आहे. कमी दर्जाच्या केळीचे दर क्विंटलमागे ५० ते ६० रुपयांनी कमी झाल्याची माहिती उत्पादक शेतकरी व व्यापाऱ्यांनी दिली.

देशांतर्गत बाजारात केळीची पाठवणूक खानदेशातून सुरू आहे. रमजानच्या पार्श्‍वभूमीवर केळी दरात मोठी सुधारणा होईल, अशी अपेक्षा होती. परंतु सध्या तशी सुधारणा दिसत नाही. केळीची आवक या महिन्यात बऱ्यापैकी वाढली आहे. थंडीची बाधा न झालेल्या (नॉन चिलिंग) केळीस प्रतिक्विंटल १६०० रुपये दर आहे. किमान दर १००० ते १२००, १३०० रुपये प्रतिक्विंटल आहेत.

पंजाब, दिल्ली येथे पाठवणुकीच्या केळीचे दर १३०० ते १३५० रुपये प्रतिक्विंटल आहेत. तर काश्मीरात पाठवणुकीच्या केळीला प्रतिक्विंटल १६०० रुपये दर आहे. केळीची आवक जळगाव जिल्ह्यातील रावेर, यावल, मुक्ताईनगर, चोपडा, धुळ्यातील शिरपूर, नंदुरबारातील शहादा, तळोदा व अक्कलकुवा भागात बऱ्यापैकी सुरू झाली आहे. सध्या प्रतिदिन ६० ट्रक (एक ट्रक १६ टन क्षमता) केळीची आवक होत आहे. ही आवक पुढे वाढणार असून, दर्जेदार केळी काढणीसाठी उपलब्ध होतील.

मध्य प्रदेशातील बऱ्हाणपूर (Burhanpur) येथेही सध्या प्रतिदिन ६० ते ७० ट्रक केळीची आवक होत आहे. तेथेही कमाल दर १६०० रुपये प्रतिक्विंटल आहेत. जळगाव, जामनेर या भागात केळीची आवक कमी झाली आहे.

कारण या भागात मृग बहरातील केळीची लागवड कमी असते. सर्वाधिक आवक रावेर तालुक्यात आहे. या भागात पिलबाग केळीसह मृग बहर केळीत काढणी सुरू आहे. जशी उष्णता वाढेल, तशी आवकही वाढणार आहे.

निर्यातदार दाखल
खानदेशात केळीची निर्यात या महिन्यात हळूहळू वेग घेत आहे. सध्या नंदुरबारातील शहादा भागातून सर्वाधिक सात ते आठ कंटेनर (एक कंटेनर २० टन क्षमता) केळीची निर्यात होत आहे. जळगाव जिल्ह्यातूनही रोज पाच ते सहा कंटेनर केळी आखाती देशांत विविध खरेदीदार कंपन्या पाठवित आहेत.

आंध्र प्रदेशात (Andhra Pradesh) केळीची आवक कमी झाली आहे. तेथे मागील महिन्यात कार्यरत निर्यातदार कंपन्या आता खानदेशात दाखल झाल्या आहेत. तीन कंपन्या जळगाव जिल्ह्यात सध्या केळी निर्यातीचे काम करीत आहेत.