Pune News : महात्मा फुले कृषी विद्यापीठ राहुरी यांचे कार्यक्षेत्रातील लोणावळा येथील केंद्राने आजपर्यंत दहा भातपिकावरील विविध रोगप्रतिकारक्षम वाण विकसित केले आहे.

तसेच भातपिकावरील विविध रोगांच्या नियंत्रणासाठी आतापर्यंत नऊ शिफारशी दिल्या आहेत, अशी माहिती महात्मा फुले कृषी विद्यापीठाचे कुलगुरू डॉ. पी. जी. पाटील यांनी दिली.

राहुरी येथील कुलगुरू डॉ. पाटील यांनी लोणावळ्यातील कृषी संशोधन केंद्राला बुधवारी (ता. १०) भेट दिली.

या वेळी मार्गदर्शन करताना डॉ. पाटील बोलत होते. या प्रसंगी कृषी संशोधन केंद्रात होत असलेल्या विविध संशोधन प्रकल्पांचा संशोधन केंद्राचे प्रभारी अधिकारी डॉ. किरणसिंह रघुवंशी यांनी विविध संशोधन प्रयोग, विस्तार कार्यक्रम या विषयी सादरीकरणाद्वारे आढावा घेतला. या वेळी पुणे कृषी महाविद्यालयाचे सहयोगी अधिष्ठाता डॉ. सुनील मासाळकर हे उपस्थित होते.

डॉ. पाटील म्हणाले की, महात्मा फुले कृषी विद्यापीठ राहुरीच्या कार्यक्षेत्रात विकसित रोग प्रतिकारक्षम वाणाची लागवड खूप मोठ्या प्रमाणात केली जाते. त्यामुळे भात पीक घेणाऱ्या शेतकऱ्यांच्या आर्थिक उत्पन्नात वाढ झाल्याचे दिसून येते. भातपिकांची उत्पादकता वाढण्यास मदत झालेली आहे. त्याचा अवलंब अनेक शेतकरी करत आहे.