Sangli News : तालुक्यातील चार गावांच्या टेंभू पाणी योजनेच्या पाणी वितरण व्यवस्थापनाची जबाबदारी जुनोनी (ता. सांगोला, जि. सोलापूर) येथील पाटबंधारे विभागाकडे दिल्याने शेतकऱ्यांची अडचण निर्माण झाली आहे. ‘लाभक्षेत्र एका जिल्ह्यात आणि व्यवस्थापन दुसऱ्या जिल्ह्यात’ असे अजब पाणी वितरण व्यवस्थापन केले आहे. त्यावर शेतकऱ्यांतून नाराजीचा सूर आहे.

टेंभू उपसा सिंचन योजनेचे १० जानेवारीपासून पाणी सुरू केले आहे. आटपाडी तालुक्यात बंदिस्त पाइपलाइनने वितरण सुरू केले आहे. यंदापासून पहिल्यांदाच पाणी वापर संस्थेच्या माध्यमातून पाटबंधारे विभाग पाणी वितरण करत आहे.

शेतकऱ्यांनी वितरण व्यवस्थेवरील संस्थेकडे लेखी मागणी करायची आहे. पाटबंधारे विभागाकडे संस्था असलेली मागणी पाठवून नियोजन केले जाते. ओढ्यावरील बंधारे भरण्याचे नियोजन स्वतः पाटबंधारे विभागाने घेतले आहे.

आटपाडी तालुक्यातून ‘टेंभू’चा डावा कालवा, घाणंद ते हिवतड कालवा, कवठेमहांकाळ आणि सांगोला असे कालवे गेलेत. घाणंद ते हिवतड कालवा तसाच पुढे सांगोला तालुक्याला जातो. हे हिवतडपर्यंतची जबाबदारी आटपाडीकडे आहे. त्याच्या पुढील जबाबदारी जुनोनी (ता. सांगोला) येथील पाटबंधारे विभागाकडे दिली आहे.

हिवतडच्या पुढे करगणी, शेटफळे, माळेवाडी, तळेवाडी आणि पात्रेवाडी या पाच गावांना ओढ्यांनी आणि बंदिस्त पाइपलाइनने पाणी दिले जाते. या गावांचे पाणी देण्याचे नियोजन जुनोनी येथून केले जाते.

सांगली जिल्ह्याच्या आटपाडी तालुक्यातील ५ गावांतील शेतकरी, पाणी वापर संस्थांना (सोलापूर) जिल्ह्यातील सांगोला विभागाकडे करावी लागत आहे. लाभक्षेत्राचा तालुका व जिल्हा एक आणि मागणी दुसरा तालुका, जिल्ह्याकडे करावी लागत आहे. आटपाडी तालुक्यातील शेतकऱ्यांना आटपाडी विभाग सोयीचा आहे. आटपाडीकडे येणे-जाणे असते. मात्र, पाण्याची मागणी नोंदवण्यासाठी सांगोल्यात जावे लागत आहे.