Latur News : गेल्या वर्षी अपुरा पाऊस झाल्यामुळे जिल्ह्यात पाणीटंचाईच्या बसत असून, तब्बल चार वर्षांनंतर टॅंकरने पाणीपुरवठा करण्याची वेळ आली आहे. जिल्ह्यात सध्या २६ गावे व बारा वाड्यांना टँकरने पाणीपुरवठा करण्यात येत असून, यात पाच सरकारी व तीस खासगी टँकरचा समावेश आहे. तर ३३५ गावे व वाड्यांसाठी ३९५ विहिरी व विंधन विहिरींच्या अधिग्रहणातून पाणीपुरवठा करण्यात येत आहे. पावसाळ्याच्या तोंडावर पाणीटंचाईची तीव्रता दिवसेंदिवस वाढत आहे.

गेल्या वर्षी अपुरा पाऊस झाल्यामुळे भूजलाची पातळी खोल गेली. यासोबत लहानमोठ्या प्रकल्पातही पुरेसा पाणीसाठा झाला नाही. याचा परिणाम सध्या जिल्ह्यातील साडेतीनशेहून अधिक गावे व वाड्यांना टंचाईची झळ सोसावी लागत आहे. २०१९ नंतर सध्या जिल्ह्यातील सहा तालुक्याला टंचाई जाणवत असून औसा व लातूर तालुक्यात सर्वाधिक टँकर सुरू आहेत. लातूरला रेल्वेने पाणीपुरवठ्याचा इतिहास असला तरी यंदा धनेगावच्या (जि. बीड) मांजरा धरणात पाणी असल्याने शहराला चार दिवसाआड पाणी पुरवठा सुरू आहे.

मांजरा धऱणासह पाणी योजना असलेल्या विविध प्रकल्पांतील पाणीसाठा जिल्हा प्रशासानाने यापूर्वीच राखून ठेवला होता. या प्रकल्पांतून अनधिकृत पाणी उपशावर कडक नियंत्रण ठेवण्यात आले. यामुळे लातूर शहराला मांजरा धरणातील जिवंत पाणीसाठ्यातून जूनअखेर, तर मृत पाणीसाठ्यातून सप्टेंबरपर्यंत पाणीपुरवठा करणे शक्य आहे.

१९ कोटींचा आराखडा मंजूर

पाणीटंचाई निवारण्याच्या विविध उपाययोजनांसाठी एप्रिल ते जून या तीन महिन्यांसाठी १९ कोटी ८५ लाखांचा आराखडा मंजूर करण्यात आला असून, यातून एक हजार ७२० उपाययोजना प्रस्तावित आहेत. आतापर्यंत नळ योजना विशेष दुरुस्तीच्या ५७ प्रस्तावांना पाच कोटी ४२ लाख, तात्पुरती पूरक नळ योजनेच्या १५ प्रस्तावांना एक कोटी ५३ लाख तर ७२ नवीन विंधन विहिरींसाठी ६३ लाखाच्या निधीला मंजुरी देण्यात आली आहे. प्रकल्पात टंचाईसाठी राखीव पाण्याचा अवैध उपसा रोखण्यासाठी केलेल्या कारवाईत आतापर्यंत ५९ मोटारी, १६१ स्टार्टर्स, १२३ बंडल वायर आदी साहित्य जप्त केले असून ८७६ वीज कनेक्शन तोडण्यात आले आहेत.