सोलापूर ः जिल्ह्यातील नळपाणी पुरवठा योजनेच्या (Water Supply Scheme) अस्तित्वातील सर्व स्रोतांचे जिओ टॅगिंग पाणी गुणवत्ता परीक्षण तसेच (एफटीकेद्वारे) तपासणी व त्याबाबतचे प्रशिक्षण घेण्यासाठी एक डिसेंबर ते ३१ डिसेंबर दरम्यान स्वच्छ जल से सुरक्षा अभियान राबविले जात असल्याची माहिती जिल्हा परिषदेचे मुख्य कार्यकारी अधिकारी दिलीप स्वामी यांनी दिली.

जलजीवन मिशनअंतर्गत केंद्र शासनाच्या जल जीवन सर्वेक्षण २०२३ चा भाग असणारे हे अभियान आहे या अभियानांतर्गत हर घर जल या मोबाईल ॲपद्वारे अस्तित्वातील सर्व पाणीपुरवठा योजना, रेट्रो फिटिंगमधील पाणीपुरवठा योजना व नवीन योजनेतील स्रोतांची जिओ टॅगिंग पूर्ण करणे, सर्व स्रोतांची मॉन्सून पश्‍चात कालावधीमधील रासायनिक व जैविक तपासणी पूर्ण करण्यात येणार आहे.

तसेच सर्व पाणी नमुने जल सुरक्षका मार्फत गोळा करून तपासणीसाठी प्रयोगशाळेत पाठविण्यात येणार आहे. त्यासाठी एफटीकेद्वारे कशा पद्धतीने पाण्याची तपासणी करावी, याबाबत गावातील पाच महिलांना प्रशिक्षण देण्यात येऊन केंद्र शासनाच्या संकेतस्थळावर त्यांची नावे अपलोड करण्यात येणार आहेत, असेही मुख्य कार्यकारी अधिकारी स्वामी म्हणाले.

कामासाठी अधिकाऱ्यांवर जबाबदारी

स्वच्छ जल से सुरक्षा या अभियानात वरिष्ठ वैज्ञानिक, भूजल सर्वेक्षण आणि विकास यंत्रणा यांनी सर्व पाणी नमुन्याची तपासणी करावी, रेट्रो फिटिंग, नवीन योजनातील स्रोतांची जिओ टॅगिंग ग्रामीण पाणीपुरवठ्याचे शाखा अभियंता हे करणार आहेत. त्यासाठी कामांच्या जबाबदारीचे वाटपही केले असल्याचे मुख्य कार्यकारी अधिकारी स्वामी यांनी सांगितले.