Parbhani News : महाबीजच्या परभणी विभागातील परभणी, हिंगोली, नांदेड, लातूर, धाराशिव, सोलापूर या सहा जिल्ह्यांमध्ये यंदाच्या (२०२४) रब्बी हंगामात हरभरा, ज्वारी, गहू, करडई, जवस, मोहरी या पिकांचा मिळून एकूण ५६ हजार ७६८ क्विंटल बियाण्याचा पुरवठा करण्यात आला आहे, अशी माहिती विभागीय व्यवस्थापक डी. डी. कान्हेड यांनी दिली.

कृषीच्या मागणीनुसार बियाणे पुरवठा केला जातो. त्यानुसार यंदाच्या रब्बी हंगामात विभागातील सहा जिल्ह्यांमध्ये आजवर हरभऱ्याच्या ४१ हजार ५५७ क्विंटल, ज्वारीच्या ११ हजार ४५३ क्विंटल, गव्हाच्या २ हजार ५९८ क्विंटल, करडईच्या १ हजार १३५ क्विंटल, जवसाच्या २० क्विंटल, मोहरीच्या ५ क्विंटल बियाण्याचा पुरवठा करण्यात आला आहे.

परभणी जिल्ह्यात हरभरा, ज्वारी, गहू, करडई, जवस या पिकांच्या ८ हजार ६०१ क्विंटल, हिंगोली जिल्ह्यात हरभरा, ज्वारी, गहू, करडई, जवस, मोहरी या पिकांच्या ४ हजार ६२५ क्विंटल बियाण्याचा पुरवठा करण्यात आला.

नांदेड जिल्ह्यात हरभरा, ज्वारी, गहू, करडई या पिकांच्या १२ हजार क्विंटल, लातूर जिल्ह्यात हरभरा, ज्वारी, गहू, करडई, जवस या पिकांच्या ११ हजार क्विंटल बियाण्याचा, धाराशीव जिल्ह्यात हरभरा, ज्वारी, गहू, करडई, जवस या पिकांच्या ९ हजार ७१३ क्विंटल तर सोलापूरात हरभरा, ज्वारी, गहू, करडई या पिकांच्या ८ हजार ९४१ क्विंटल बियाण्याचा पुरवठा करण्यात आला आहे.