Palghar News : डहाणू तालुक्यातील शेतकरी उन्हाळी भातशेतीच्या कामात मग्न झाले आहेत. या वर्षी पाटबंधारे विभागाने कालवे जुने झाल्यामुळे त्यांच्या दुरुस्तीचे काम हाती घेतले होते.

अनेक ठिकाणी ते नादुरुस्त झाल्यामुळे पाणी वाया जात होते. ते काम पूर्ण झाल्याने शेतीसाठी आवश्यक पाणी कालव्यातून सोडण्यात आले. त्यामुळे शेतकरी नव्या उमेदीने पुन्हा शेतीत गुंतले आहेत.

कालव्याच्या दुरुस्तीमुळे या वर्षी कालव्याला पाणी मिळेल की नाही, याबाबत शंका होती. त्यामुळे परिसरातील शेतकरी चिंतेत होते; मात्र पाटबंधारे प्रशासनाने वेळीच निर्णय घेत कालव्यात पाणी सोडल्याने शेतकरी पुन्हा भातशेती लागवडीकडे वळले आहेत.

रायतळी, रणकोळ, ऐना, साखरे, आंबिवली, निकणे, रानशेत, वधना, शेल्टी आणि सारणी या गावांतील शेतकऱ्यांनी दुबार पेरणी व लावणीला सुरुवात केली आहे. कालव्याच्या पाण्यामुळे शेतीला संजीवनी मिळाल्याने शेतकऱ्यांमध्ये समाधानाचे वातावरण आहे.

यावर्षी कालव्याला पाणी मिळणार नाही, अशी भीती वाटत होती. त्यामुळे उन्हाळी भातशेती होणार नाही, असे वाटले होते; पण पाणी सोडल्याने आम्ही भात लागवड करीत आहोत. आता जास्त लक्षपूर्वक शेतीतून उत्पन्न घेण्याचा प्रयत्न करतो. कालव्याचे काँक्रीटीकरण बांधकाम झाल्याने पाणी चांगल्या प्रमाणात आम्हाला मिळते, असे शेतकरी निनाद पाटील म्हणाले.