Nanded News : नांदेड प्रादेशिक सहसंचालक (साखर) कार्यालयांतर्गत नांदेड विभागात २९ साखर कारखान्यांनी राज्याच्या साखर आयुक्ताकडे गाळप परवान्यासाठी अर्ज केले आहेत. त्यापैकी १५ साखर कारखान्यांची धुराडी पेटली आहेत.

या कारखान्यांनी मंगळवारअखेर (ता. ३) दोन लाख ८६ हजार १०३ टन उसाचे गाळप केले आहे. तर एक लाख ७७ हजार ७५ क्विंटल साखरचे उत्पादन केल्याची माहिती साखर सहसंचालक सचिन रावल दिली.

नांदेड प्रादेशिक सहसंचालक (साखर) विभागातील नांदेडसह परभणी, हिंगोली व लातूर या चार जिल्ह्यांतून गाळप हंगाम २०२४-२५ साठी २९ कारखान्यांनी ऑनलाइन अर्ज केले होते. यातील काही कारखाने वगळता बहुतांश कारखान्यांना गाळप परवाना मिळाला आहे. यातील १५ कारखान्यांनी गाळप हंगाम सुरू केला आहे. यात १० खासगी, तर पाच सहकारी साखर कारखान्यांचा समावेश आहे.

मंगळवारअखेर (ता.तीन) या कारखान्यांनी दोन लाख ८६ हजार १०३ टन उसाचे गाळप केले आहे. तर एक लाख ७७ हजार ७५ क्विंटल साखरचे उत्पादन केल्याची माहिती साखर सहसंचालक सचिन रावल दिली. साखरेचा सरासरी उतारा ५.६४ टक्के नांदेड विभागात सर्वाधिक पाच साखर कारखाने लातूर जिल्ह्यात सुरू झाले आहेत.

यात तीन खासगी तर दोन सहकारी साखर कारखान्यांचा समावेश आहे. परभणी जिल्ह्यात तीन कारखाने सुरू झाले आहेत. हे सर्वच कारखाने खासगी आहेत. नांदेड जिल्ह्यात चार कारखान्यांनी गाळप सुरू केले आहे. यात तीन खासगी तर एक सहकारी साखर

कारखान्याचा समावेश आहे. हिंगोली जिल्ह्यात तीन कारखाने सुरू झाले आहेत. यात एक खासगी दोन सहकारी साखर कारखान्यांनी गाळप सुरू केले आहे. दरम्यान, साखर कारखाने विलंबाने सुरू झाल्यामुळे विभागात गाळपाला अद्याप गती आली नाही.