Nagpur News : लॅक्‍टोजचे प्रमाण अधिक आणि फॅट कमी असलेले गाढविणीचे दूध अनेक आजारांवर प्रभावी ठरू शकते. त्यामुळे या दुधातील औषधी गुणधर्मांचा अभ्यास महाराष्ट्र पशू व मत्स्य विज्ञान विद्यापीठअंतर्गत असलेल्या उदगीर येथील पशुवैद्यकीय व पशुविज्ञान महाविद्यालयातील तज्ज्ञ करीत आहेत, अशी माहिती कुलगुरू डॉ. नितीन पाटील यांनी दिली.

गाढविणीचे दूध मानवी आरोग्यासाठी उपयुक्‍त असल्याचे संशोधनाअंती समोर आले आहे. या संदर्भात डॉ. मोहम्मद रजियोद्दीन म्हणाले, की गाढविणीचे दूध मानवी दुधासारखे आहे. या दुधात ९० टक्‍के पाणी असते. लॅक्‍टोजचे प्रमाण अधिक तर फॅट कमी आहे. दुधातील जिवाणू, बुरशीजन्य रोग प्रतिकारक्षमतेविषयी अभ्यास होणार आहे.

लहान मुलांच्या पोटदुखीवर हे दूध प्रभावी ठरते का, याचाही अभ्यास ‘माफसू‘कडून होणार आहे. हे दूध हायपोॲलर्जेनिक असून त्यामुळे यात ॲलर्जी कमी करण्याची क्षमता आहे. या दुधाचा साबण, क्रीम, सौंदर्यप्रसाधनामध्ये वापर करण्याबाबतही विशेष अभ्यास करण्यात येणार आहे.

एक गाढवीण दर दिवसाला सरासरी ८०० मिलि दूध देऊ शकते. गाढविणीचे आरोग्य, आहार, वातावरण असे अनेक घटक दूध उत्पादनावर परिणाम करतात. या दुधामध्ये प्रथिने १.५ ते १.८, फॅट ०.२ ते १.०, लॅक्‍टोज ६.० ते ७.०, कॅल्शिअम ०.१ ते ०.२, लॅक्‍टोफेरिन ०.२ ते ०.०३, जीवनसत्त्व बी ०.०३, जीवनसत्त्व अ ०.०५, जीवनसत्त्व ड ०.०००५ टक्‍का असते.