Baramati News : झेंडा कोणत्याही पक्षाचा असो, मात्र त्यांचा दांडा हा मराठा समाजाचा आहे, जो आरक्षण देईल, त्याच्या पाठीशी मराठा समाज खंबीरपणे उभा राहील, असा निर्धार सोमवारी (ता. ४) बारामतीत मराठा क्रांती मोर्चाच्या वतीने व्यक्त केला गेला.

जालना येथे मराठा आरक्षणाबाबत आंदोलकांवर झालेल्या लाठीहल्ल्याच्या निषेधार्थ बारामतीत मोर्चा व त्या नंतर झालेल्या सभेत अनेक वक्त्यांनी मनोगत व्यक्त केले. त्या प्रसंगी हा निर्धार व्यक्त झाला.

मराठा समाजाच्या महिलांना मारहाण झाली, ही बाब संतापजनक असून अशा घटना घडल्यास मराठा समाज पेटून उठल्याशिवाय राहणार नाही, असाही इशारा दिला गेला. मराठा क्रांती मोर्चामध्ये दुफळी माजविण्याचा काही जणांचा राजकीय डाव असला तरी मराठा समाज एकसंघच असेल, असा निर्धार या प्रसंगी बोलून दाखविण्यात आला. मराठा समाजाला राजकीय आरक्षणापेक्षाही शैक्षणिक व सामाजिक आरक्षण जास्त महत्त्वाचे वाटते, हे आरक्षण मिळण्यासाठी समाज एकसंघ असेल, असेही वक्त्यांनी नमूद केले.

केंद्राने आगामी काळात बोलाविलेल्या अधिवेशनामध्ये मराठा समाजाला आरक्षण देण्याचा अध्यादेश जारी करावा, अशीही मागणी केली गेली. राज्यात व केंद्रात मराठा समाजाचे खासदार आमदार असूनही गेल्या चाळीस वर्षांत आरक्षण मिळत नाही याबाबत खेद व्यक्त केला गेला.

आरक्षणावर एकत्र का येत नाही...?’

सरकार पाडणे व बनविणे यासाठी थेट गुवाहाटीपर्यंत आमदारांना जाता येते, मग आरक्षणाच्या मुद्द्यावर सर्वांना एकत्र का येता येत नाही, असा संतप्त सवाल वक्त्यांनी उपस्थित केला.

शांततेतील मोर्चा आता नाही....

मराठा आरक्षणाच्या मुद्द्यावर राज्यात ५८ मूक मोर्चे अत्यंत शांततेने मराठा बांधवांनी काढले, पण त्याचा काहीही उपयोग न झाल्याने आता सगळे प्रोटोकॉल बाजूला ठेवून मराठा समाजाचे मोर्चे निघतील, त्याची जबाबदारी राज्य सरकारची असेल, असा इशाराही दिला गेला. या पुढील काळातील मोर्चे हे मंत्रालयावर काढण्याची तयारी करण्याचेही सूतोवाच केले गेले. या पुढील मोर्चा हा मूक मोर्चा नसेल तर तो ठोक मोर्चा असेल असेही जाहीर केले गेले.