Jalgaon News : खानदेशात वादळ, गापिटीने पीकहानी सुरूच आहे. यातच रविवारी (ता. १८) दुपारी व सायंकाळी जळगाव, धुळ्यातील अनेक भागांत वादळी पाऊस झाला. यात मका, केळी, बाजरी, कांदा आदी पिकांना मोठा फटका बसला.

खानदेशात मार्चपासून आतापर्यंत वादळी, पाऊस, गारपीट, अशी संकटांची मालिका सुरू आहे. यात सुमारे साडेपाच हजार हेक्टरवरील पिकांची हानी झाली आहे. या महिन्यात गारपीट व वादळात सुमारे तीन हजार हेक्टर क्षेत्र जळगावात बाधित झाले आहे.

तर धुळ्यात दीड हजार आणि नंदुरबारमध्ये एक हजार हेक्टरला फटका बसला आहे. यातच टक्केवारी कमीअधिक दाखविली जात असल्याने अनेक तलाठी पंचनामे टाळत आहेत. फक्त वारा होता, एक सेकंद गारा पडल्या, अशी बतावणी प्रशासनातील कृषी सहायक व तलाठी करीत असल्याने अनेक शेतकरी पंचनाम्यांपासून वंचित आहेत.

रावेरमध्ये केळीच्या नुकसानीसंबंधी सुमारे दोन कोटी रुपयांची हानी झाली आहे. मका, कांदा, बाजरी आदी पिके जमिनीवर लोळली असून, त्यांची कणसे जमिनीला टेकली आहेत. माती लागून त्यांचे नुकसान होत आहे.

हे नुकसानदेखील प्रशासनाने ग्राह्य धरलेले नाही. शेतीकामांवर या वादळी पावसाचा परिणाम झाला आहे. तसेच फळ पिकांची काढणी रखडत असून, टोमॅटो, केळी, पपईचे दर दबावात आले आहेत. केळी दरात एकाच दिवसात क्विंटलमागे २०० ते ३०० रुपयांची घट झाली आहे.

या महिन्यात तिसऱ्यांना गारपीट व वादळी पाऊस झाला आहे. रविवारी जळगाव जिल्ह्यात एरंडोल, जळगाव, भुसावळ आदी भागांत वादळी पाऊस झाला. यामुळे केळी, मका, कांदा, बाजरीचे नुकसान झाले. धुळ्यातही धुळे, साक्री, शिरपूर भागांत पाऊस झाला. तेथे गारपीट झालेली नसल्याची माहिती आहे.

तर नंदुरबारमध्येही सायंकाळी अनेक गावांत सुसाट वारा व तुरळक पाऊस झाला. सध्या बाजरी, मका कापणी, मळणीची कामे सुरू आहेत. पण पावसाळी स्थितीमुळे त्यात व्यत्यय येत आहे. मजुरी अधिकची लागत आहे.

अनेक भागांत केळीची पाने फाटली. तसेच गारपिटीने नुकसानदेखील झाले आहे. सुमारे दोन ते अडीच मनिटे काही भागात गोटीच्या आकाराच्या गारा पडल्या. तसेच लिंबू पिकात फळगळ झाली आहे. रोज पाऊस व वादळ येत असल्याने नुकसानीचे आकडे वाढत आहेत. शेतकरी या वातावरणामुळे चिंतेत असून, मोठी हानी होत असल्याने वित्तीय संकटे तयार होत आहेत.