Hingoli News : जिल्ह्यात सोमवारी (ता. ९) रात्री झालेल्या वादळी वारे पावसामुळे ७६३ हेक्टरवरील पिकांचे नुकसान झाल्याचा प्राथमिक अंदाज आहे. कळमनुरी व वसमत तालुक्यातील केळी उत्पादक पट्ट्यातील अनेक गावांतील घड उतरणीस आलेल्या केळी बागा उद्ध्वस्त झाल्या आहेत. हाती आलेला घास निसर्गाने हिरावून घेतल्यामुळे शेतकऱ्यांच्या अडचणी वाढल्या आहेत.

हिंगोली जिल्ह्यातील डोंगरकडा, आखाडा बाळापूर, गिरगाव, कुरुंदा महसूल मंडळातील केळी उत्पादक पट्ट्यातील डोंगरकडा, जवळा पांचाळ, डिग्रस बुद्रुक, रेडगाव, वडगाव, दांडेगाव, गिरगाव, परजणा, खाजमापूरवाडी, हिवरा, कुरुंदा आदी गावांतील केळी उत्पादक शेतकऱ्यांना वादळी वारे पावसाचा मोठा तडाखा बसला आहे.

बहुतांश शेतकऱ्यांच्या केळी काढणीच्या अवस्थेत आहेत. काही ठिकाणी घडाची काढणी सुरू झाली आहे. प्रतिक्विंटल अठराशे ते दोन हजार रुपये दर आहेत. परंतु वादळामुळे झाडे मोडून पडल्यामुळे अपरिपक्व अवस्थेतील तसेच परिपक्व घडांचे नुकसान झाल्याने दर्जावर परिणाम झाला. वादळामुळे घरे, आखाड्यावरील पत्रे उडून गेले.

खरीप पेरणीच्या तोंडावर नुकसान झाले. पंचनामे पूर्ण करून तत्काळ आर्थिक मदत देण्याची मागणी बाधित शेतकऱ्यांनी केली आहे. जिल्ह्यातील २५ मंडलांमध्ये बुधवारी (ता. ११) सकाळी १० पर्यंतच्या २४ तासांत हलका ते जोरदार पाऊस झाला.

सरासरी ११.९ मिमी पावसाची नोंद झाली. जिल्ह्यात १ जूनपासून आजवर सरासरी १९.५ मिमी पाऊस झाला आहे. २४ तासांतील मंडलनिहाय पाऊस (मिमीमध्ये) ः डिग्रस कऱ्हाळे १०, कळमनुरी ३०, वाकोडी २४, नांदापूर ४२, वसमत २५, अंबा ३५.५, हयातनगर ३५.५, हट्टा १९.५, टेंभुर्णी ३१.८, कुरुंदा १५.५, येळेगाव १०.