Pune News : तालुक्यात उन्हाच्या तडाख्यात रब्बी हंगामातील उन्हाळी कांदा काढणीचे काम वेगाने सुरू आहे. सरकारच्या निर्यातीबाबतच्या चुकीच्या धोरणांमुळे सध्या बाजारात कांद्याला समाधानकारक बाजारभाव मिळत नाही.

यामुळे आगामी काळात कांद्याला चांगला बाजारभाव मिळेल आणि भांडवली खर्च निघून नफा शिल्लक राहील या अपेक्षेने काही शेतकऱ्यांची गोलटी, मध्यम, मोठा कांदा असे प्रकार करून वेगवेगळ्या पद्धतीने साठवणूक करण्याची लगबग सुरू आहे.

गारपिटीचा पाऊस, सतत बदलत्या हवामानामुळे पिकांवर विविध रोगांचा झालेला प्रादुर्भाव, रासायनिक खते व औषधांच्या गगनाला भिडलेल्या किमती, वाढलेली मजुरी, शेतकरी विद्युत रोहित्र चोरीमुळे हैराण झालेले असताना त्यातच सुरू झालेले भारनियमन यांसारख्या अनेक समस्यांचा सामना करत मोठ्या कष्टाने शेतकरी कांदा पिकाचे उत्पादन घेतात.

मात्र ऐन विक्रीच्या वेळी कांद्याचे बाजारभाव पडल्याने शेतकऱ्यांच्या डोळ्यात पाणी आले आहे. कांद्याला एकरी सरासरी ४५ ते ५० हजार रुपये खर्च येतो. सध्या कांद्याला प्रतवारी नुसार १३ ते १६ रुपये प्रतिकिलो बाजारभाव मिळत आहे.

यामधून उत्पादन खर्चही निघत नाही. त्यामुळे कवडीमोल भावाने कांदा विक्री करण्याची वेळ तालुक्यातील शेतकऱ्यांवर आली आहे. तर काही शेतकऱ्यांनी आगामी काळात कांद्याला चांगला भाव मिळेल आणि भांडवली खर्च निघून नफा शिल्लक राहील या अपेक्षेने कांदा साठवणूक करून ठेवण्याचा निर्णय घेतला आहे.