Chh. Sambhajinagar News : केंद्रीय कापूस संशोधन संस्था नागपूर व गांधीली स्थित एमजीएम कृषी विज्ञान केंद्राच्या पुढाकारातून छत्रपती संभाजीनगर जिल्ह्यातील पाच तालुक्यात १७५ एकरांवर कापूस उत्पादन वाढीसाठीचा विशेष प्रकल्प राबविला गेला. तीन तंत्रज्ञानाचा संगम घडवून राबविल्या गेलेल्या या प्रकल्पाचे फलित कापसाच्या राहिलेल्या वेचणीनंतर स्पष्ट होणार आहे.

कृषी विज्ञान केंद्राच्या माहितीनुसार, कापसाची उत्पादकता वाढविण्यासाठी केंद्रीय कापूस संशोधन संस्थेच्या मार्गदर्शन व समन्वयातून एमजीएम कृषी विज्ञान केंद्राच्यावतीने छत्रपती संभाजीनगर जिल्ह्यातील गंगापूर, वैजापूर, कन्नड, खुलताबाद, पैठण या पाच तालुक्यांतील ३१ गावांतील ८९ शेतकऱ्यांच्या १७५ एकरांवर कापूस उत्पादन वाढीसाठी विशेष प्रकल्प राबविला गेला.

या प्रकल्पात गंगापूर तालुक्यातील १० गावांतील ३०, वैजापूर तालुक्यातील ७ गावांतील २५, कन्नड तालुक्यातील ११ गावांतील २७, खुलताबाद तालुक्यातील २ गावांतील ६, तर पैठण तालुक्यातील एका गावातील एक शेतकरी सहभागी झाला होता. या विशेष प्रकल्प अंतर्गत कृषी विज्ञान केंद्राच्या वतीने प्रत्येक प्रक्षेत्रावर आतापर्यंत चार प्रक्षेत्र भेटी घेण्यात आले.

चार शेतीदिन कार्यक्रम व आजवर सहा पीक कापणे प्रयोग घेण्यात आले. कृषी विज्ञान केंद्राच्या प्रक्षेत्रावर प्रकल्पांतर्गत प्रात्यक्षिक प्लॉटही घेण्यात आला. विशेष कापूस प्रकल्प अंतर्गत एमजीएम कृषी विज्ञान केंद्र गांधेली येथे नुकत्याच घेण्यात आलेल्या उत्तम कापूस व्यवस्थापन एकदिवसीय कार्यशाळेच्या वेळी शेतकऱ्यांनी या प्लॉटला भेट देऊन प्रत्यक्ष पाहणीही केली.

प्रकल्पात वापरले तीन तंत्रज्ञान

कापूस उत्पादन वाढीसाठीच्या विशेष प्रकल्पात शेतकऱ्यांच्या प्रक्षेत्रावर घन पद्धतीने कापूस लागवड, सघन कापूस लागवड आणि दादा लाड तंत्रज्ञानाचा वापर केला गेला. घनपद्धतीने कापूस लागवडीत कपाशीतील अंतर ३ बाय १ फूट तसेच सघन कापूस लागवड पद्धतीत कपाशीचे अंतर ३ फूट बाय ९ इंच सोबत वाढरोधकाचा वापर करण्यात आला. घनपद्धतीने कपाशी लागवड ९ एकरांवर, तर सघन पद्धतीने कापूस लागवड तब्बल १४५ एकरांवर करण्यात आली.