Yavatmal News : शासकीय सोयाबीन खरेदी केंद्र सुरू झाले नाही. त्यामुळे सोयाबीनचे दर हमीभावाच्या खाली आले आहे. हमीभाव ४६०० रुपये असून सोयाबीनला तीन हजार आठशे ते चार हजार पाचशे रुपये दर मिळत आहे. सोयाबीन शेतकऱ्यांचे महत्त्वाचे पीक आहे.

दसऱ्याला घरात येणारे पीक विकून पुढचा शेतीचा खर्च सोयाबीनवर अवलंबून असतो. यंदा सोयाबीन उत्पादकांना अनेक संकटांचा सामना करावा लागला आहे. अजूनही संकटे संपलेली नाही. शेतीमालाचे दर हमीभावापेक्षा कमी झाले आहेत. त्यामुळे शेतकऱ्यांचे मोठे आर्थिक नुकसान होत आहे. उत्पादनावर आधारित शेतीमालाच्या दरांचा मुद्दा पुन्हा ऐरणीवर येण्याची शक्यता आहे.

सध्या सोयाबीन शेतीमालाचे दर हमीभावापेक्षा कमी आहेत. जिल्ह्यात सर्वाधीक पेरा कापसाचा झाला आहे. त्या खालोखाल सोयाबीनचा पेरा आहे. सोयाबीन शेतकऱ्यांच्या नगदी पिकातील आहे. हे पीक विकून शेतकरी कापूस किंवा तुरीचा हंगाम काढतो. सोयाबीन पिकावर शेतकऱ्यांची दिवाळी साजरी होते.

यंदा अतिवृष्टी, पूर तसेच रोगराईने पिकांचे मोठे नुकसान झाले आहे. यातून वाचलेले पीक शेतकऱ्यांनी काढणीला सुरुवात केली आहे. जेमतेम सोयाबीन शेतकऱ्यांच्या घरात यायला सुरुवात झाली आहे. अशातच सोयाबीनचे दर कोसळले आहे.

शेतीमालाचे दर हमीभावापेक्षा कमी आहेत. जिल्ह्यात कुठेही शासकीय धान्य खरेदी सुरू झालेली नाही. त्याचा फटका शेतकऱ्यांना बसण्याचा धोका वाढला आहे. दरवर्षी ऑक्टोबर महिन्यात सोयाबीन खरेदी केंद्र सुरू केले जाते. त्यामुळे शेतकऱ्यांना हमीभावापेक्षा कमी दर मिळत नाही.