Dharashiv News : शासनाकडून सोयाबीन हमीभाव केंद्रामधून खरेदी सुरु करण्यात येत आहे. खासगी आडत्यांकडून हमीभावापेक्षा कमी दराने सोयाबीन खरेदी केली जात आहे. यामुळे शेतकऱ्यांचे आर्थिक नुकसान होत आहे.

एकता सहकारी संस्थांकडून कळंबमध्ये सोयाबीन हमीभाव खरेदी केंद्र सुरु करत आहे. परंतु, कळंब शिराढोण परिसरापासून पंचवीस किलोमीटर अंतर आहे. शेतकऱ्यांना केंद्रामध्ये विक्री करण्यासाठी आॅनलाइन रजिस्ट्रेशन करुन सिरीअल प्रमाणे नंबर आल्यावर सोयाबीन स्वखर्चाने कळंबला घेऊन जावे लागणार होते.

सिरीअलप्रमाणे नंबर असल्याने एका गावातून फक्त एकाचाच नंबर येत असल्याने एकट्यासाठी माल घेऊन जाण्याासठी वाहतुकीचा अतिरिक्त भार शेतकऱ्यांना द्यावा लागत होता.

शिवाय मोजमापसाठी नंबर असल्याने दिवसभर थांबावे लागणार असल्याने वाहन मालकांना जादा भाडे द्यावे लागणार होते. खरेदी विक्री संघ कळंबच्या शिराढोण येथील उपबाजार समितीतील गोडाऊनमध्ये सोयाबीन हमी भाव खरेदी केंद्र सुरु करण्याचा निर्णय घेण्यात आला आहे.