Jalgaon News : खानदेशात रब्बी किंवा उन्हाळ सोयाबीनची पेरणी यंदा काहीशी वाढणार आहे. पेरणी ३००० हेक्टरवर होवू शकते. एकट्या जळगाव जिल्ह्यातील पेरणी सुमारे २००० हेक्टरपर्यंत होणार असल्याची माहिती आहे.

धुळे व नंदुरबारात रब्बी सोयाबीनची पेरणी फारशी केली जात नाही. या भागात कृत्रीम जलसाठाधारक सोयाबीनएेवजी भुईमुगास पसंती देतात. थंडी अधिक पडेल व सोयाबीनचे उत्पादन घटेल, अशी भीती काही शेतकऱ्यांना आहे. परंतु प्रतिकूल स्थितीतही अनेक शेतकरी सोयाबीनचे चांगले उत्पादन रब्बीत घेत आहेत. नंदुरबार, धुळ्यातील पेरणी स्थिर राहील, असेही संकेत आहेत.

जळगाव जिल्ह्यात उन्हाळ सोयाबीनची पेरणी नोव्हेंबर महिन्यातच सुरू होणार आहे. त्यात कमी कालावधीत येणाऱ्या वाणांना पसंती देण्यात येईल, असे दिसत आहे. पाण्याची अडचण नसल्याने पेरणी वाढणार आहे. इतर पिकांनाही मुबलक पाणी मिळावे यासाठी शेतकऱ्यांनी तुषार सिंचन, ठिबकच्या माध्यमातून सोयाबीनचे सिंचन करण्याचे नियोजन केले आहे.

सोयाबीनचे दर यंदा खरिपात अस्थिर आहेत. परंतु सोयाबीन उत्पादन कमी होईल. कारण पावसात पिकहानी होत आहे. किमान ४१०० व कमाल ४६०० रुपये प्रतिक्विंटलचा दर सध्या आहे. नंतरही दर टिकून राहतील, अशी अपेक्षा शेतकऱ्यांना आहे. पेरणीच्या वेळेसही दर ४१०० ते ४५०० रुपये प्रतिक्विंटल, असे होते.

यामुळे सोयाबीनची पेरणी शेतकऱ्यांनी केली. परंतु या महिन्यात दरात सुधारणा झाली असून, दर ४१०० ते ४६०० रुपये प्रतिक्विंटल, असे आहेत. दर टिकून राहतील व अधिकचा नफा मिळेल, या नियोजनातून शेतकऱ्यांनी सोयाबीन पेरणीचे नियोजन केले आहे. सोयाबीनची पेरणी धुळे, नंदुरबारात वाढण्याची शक्यता आहे. कारण सर्वच प्रकल्पांत जलसाठा मुबलक आहे.

पेरणी गिरणा, तापीकाठालागत अधिक

सोयाबीनची पेरणी गिरणा, तापी, वाघूर नदीच्या क्षेत्रात वाढणार आहे. जळगाव जिल्ह्यात उन्हाळ सोयाबीन रावेर भागात कमी असतो. परंतु यावल, चोपडा, पाचोरा, जामनेर, भडगाव, चाळीसगाव, धरणगाव, जळगाव, अमळनेर, धुळ्यातील शिरपूर, नंदुरबारातील शहादा, तळोदा भागात उन्हाळ सोयाबीन पीक असणार आहे. पेरणी नोव्हेंबर व डिसेंबरच्या सुरवातीलाच अनेकांनी करण्यासाठी नियोजन केले आहे.