Nashik News : आदिवासी बांधवांचे जीवनमान उंचावण्यासाठी कटिबद्ध असलेल्या शबरी आदिवासी विकास महामंडळाने लाभार्थ्यांच्या प्रशिक्षणासाठी महाबँक आरसेटी या संस्थेसमवेत सामंजस्य करार केला आहे. या करारामुळे आता शबरीच्या लाभार्थ्यांना मोफत प्रशिक्षण मिळणार आहे.

राज्य व केंद्र शासनाच्या कर्ज योजना, पथदर्शी दुग्धविकास प्रकल्प यांसह इतर योजनांमधील लाभार्थ्यांना फायदा होणार आहे. या सामंजस्य करारामुळे शबरीच्या प्रशिक्षणार्थींना आरसेटीचे बळ मिळणार आहे.

शबरी आदिवासी वित्त व विकास महामंडळामार्फत आदिवासी बांधवांसाठी केंद्र आणि राज्य शासनाच्या विविध कर्ज योजना राबविण्यात येतात. तसेच त्यांना व्यवसाय वृद्धीसाठी प्रशिक्षण कार्यशाळा देखील राबविण्यात येत असतात.

या कार्यशाळेमध्ये दस्तऐवजीकरण, लेखा, विपणन, सोशल मीडिया यांचे प्रशिक्षण दिले जात असते. या सर्व लाभार्थ्यांना वेळोवेळी देण्यात येणाऱ्या प्रशिक्षणासाठी महाबँक आरसेटीच्या माध्यमातून तीन वर्षांसाठी मोफत प्रशिक्षण सत्र राबविण्याबाबत सामंजस्य करार करण्यात आला.

महामंडळाच्या कार्यालयात झालेल्या छोटेखानी कार्यक्रमात आदिवासी विकास आयुक्त तथा शबरी आदिवासी वित्त व विकास महामंडळाच्या व्यवस्थापकीय संचालक लीना बनसोड आणि महाबँक आरसेटीचे झोनल व्यवस्थापक सी. बी. सिंग यांनी करारनामा हस्तांतरीत केला. या वेळी वरिष्ठ सल्लागार प्रशांत ब्राह्मणकर, सल्लागार पंकज कुलकर्णी, दीपककुमार पाटील, शेषराव ससाणे, सचिन खाडे महाबँक आरसेटीचे संचालक जी. जी. सरोदे आदी उपस्थित होते.