Washim News : शेतीमध्ये विविध प्रयोग, उत्पन्न वाढीसाठी केलेल्या प्रयत्नांची कृषी खात्याने दखल घेत जिल्ह्यातील सात शेतकऱ्यांना विविध पुरस्कार देऊन गौरविले. मुंबई येथे नुकत्याच झालेल्या कार्यक्रमात राज्यपाल सी. पी. राधाकृष्णन यांच्याहस्ते सन्मानित करण्यात आले. या वेळी उपमुख्यमंत्री अजित पवार, कृषिमंत्री धनंजय मुंडे व इतर प्रमुख अधिकारी, शेतकरी मोठ्या संख्येने उपस्थित होते.

जिल्ह्यातील मंगरूळपीर तालुक्यातील चांभई येथील दिलीप नारायणराव फुके यांना सन २०२२ चा वसंतराव नाईक कृषिभूषण पुरस्कार देण्यात आला. तर याच वर्षासाठी युवराज पुंडलिक अव्हाळे (रा. जांब, ता. मंगरूळपीर), सन २०२१ वर्षातील जिजामाता कृषिभूषण पुरस्कार पूजा अजय ढोक (रा. ईंझोरी, ता. मानोरा), सन २०२० साठी अजय ढोक (रा. ईंझोरी, ता. मानोरा) यांना वसंतराव नाईक शेतीनिष्ठ पुरस्कार देऊन गौरविण्यात आले.

याशिवाय रवींद्र गायकवाड (रा. गायवळ, ता. कारंजा), दिलीप कंकाळ (सेवानिवृत्त अधिकारी, रा. वाशीम) आणि भागवत श्रीराम ढोबळे (बाभूळगाव, ता. जि. वाशीम) यांना राज्यपालांच्या हस्ते पुरस्कार देऊन सन्मानित करण्यात आले.

बीबीएफच्या प्रचार, प्रसारात फुके यांचा वाटा

दिलीप फुके यांनी मागील काही वर्षांत बीबीएफ या तंत्रज्ञानाचा वापर, प्रचार, प्रसारात मोठी भूमिका बजावली आहे. त्यांच्यामुळे अनेक शेतकरी या तंत्रज्ञानाचा वापर करून चांगले उत्पादन मिळवत आहेत.

अति आणि कमी पावसातही हे तंत्र अतिशय फायदेशीर असल्याने शेतकरी याचा वापर करीत आहेत. त्यांच्या कार्याची दखल पुरस्काराच्या रूपाने घेण्यात आली. तसेच इतर पुरस्कार विजेत्या शेतकऱ्यांनी चाकोरीबाहेर जात शेतीत प्रयोगशीलता जोपासली आहे. त्यांना या कामगिरीसाठी पुरस्कार देण्यात आले.