Parbhani Cotton News : परभणी-हिंगोली जिल्ह्यात मंगळवार (ता. ३०) पर्यंत बी. टी. कपाशी बियाण्याची सुमारे ६ लाख पाकिटे तसेच सोयाबीनच्या ८३ हजार क्विंटल बियाण्याचा पुरवठा करण्यात आला आहे. कपाशीच्या बियाण्याच्या विक्रीस गुरुवारी (ता. १) सुरवात होणार आहे, अशी माहिती कृषी विभागाच्या सूत्रांनी दिली.

परभणी जिल्ह्यात यंदाच्या खरिपात १ लाख ९५ हजार हेक्टरवर कपाशीची लागवड प्रस्तावित आहे. त्यानुसार बियाण्याची गरज पूर्ण करण्यासाठी बियाणे उत्पादक कंपन्यांकडे विविध वाणांच्या १० लाख ७२ हजार ५०० बियाणे पाकिटांची मागणी करण्यात आलेली आहे.

बियाणे कंपन्यांनी पुरवठा सुरु केला असून मंगळवार (ता. ३०) पर्यंत जिल्ह्यात ५ लाख ५० हजारांवर बियाणे पाकिटे उपलब्ध झाली आहेत. यंदा सोयाबीनची २ लाख ५० हजार हेक्टरवर पेरणी प्रस्तावित आहे. त्यासाठी १ लाख ८७ हजार ५०० क्विंटल बियाण्याची गरज आहे.

ग्रामबिजोत्पादन मोहिमेद्वारे तसेच शेतकऱ्यांचे घरचे मिळून १ लाख २१ हजार ८७५ क्विंटल बियाणे उपलब्ध होईल. उर्वरित ६५ हजार ६२५ क्विंटल बियाण्याची मागणी बियाणे उत्पादक कंपन्यांकडे करण्यात आली आहे.

त्यात महाबीजकडे २० हजार क्विंटल, राष्ट्रीय बियाणे महामंडळाकडे ५ हजार क्विंटल, खासगी कंपन्याकडील ४० हजार ६२५ क्विंटल बियाण्याचा समावेश आहे.

खासगी कंपन्याकडील ईगल कंपनीचे २० हजार क्विंटल, महागुजरात कंपनीकडे ५ हजार ५०० क्विंटल, यशोदा कंपनीकडे ६ हजार ५०० क्विंटल, बसंत अॅग्रोकडे ४ हजार क्विंटल, ग्रीन गोल्ड कडे १० हजार ५०० क्विंटल, अंकुर कंपनीकडे ४ हजार ५०० क्विंटल, इतर कंपन्यांकडे ३ हजार ६२५ क्विंटल बियाण्याची मागणी करण्यात आली आहे.

मंगळवार (ता. ३०) पर्यंत सोयाबीनच्या २४ हजार क्विंटल बियाण्याचा पुरवठा झाला, असे मोहीम अधिकारी शंकर बलशेटवार यांनी सांगितले.

हिंगोलीत यंदा कपाशीची ३२ हजार १५९ हेक्टरवर लागवड प्रस्तावित आहे.त्यानुसार बीटी कपाशी बियाण्याच्या १ लाख ६० हजार ७९३ पाकिटांची मागणी करण्यात आली आहे.

खासगी कंपन्यांनी मंगळवार (ता. ३०) पर्यंत ४१ हजार ८९५ पाकिटांचा पुरवठा केला आहे. गुरुवार (ता. १) पासून बियाणे विक्री सुरु होईल. जिल्ह्यात यंदा सोयाबीनचे प्रस्तावित क्षेत्र २ लाख ५७ हजार ४२९ हेक्टर आहे. त्यानुसार १ लाख ९१ हजार २५० क्विंटल बियाणे लागणार आहे.

ग्रामबिजोत्पादनातून उपलब्ध बियाणे वगळून उर्वरित ६६ हजार ९३७ क्विंटल बियाण्याची मागणी कंपन्यांकडे करण्यात आली आहे.

त्यापैकी ५९ हजार ८१८ क्विंटल बियाण्याचा पुरवठा झाला आहे. त्यापैकी ४ हजार ९४८ क्विंटल बियाण्याची विक्री झाली, असे जिल्हा कृषी विकास अधिकारी नीलेश कानवडे यांनी सांगितले.