Nashik News: आदिवासी विकास महामंडळाच्या धान खरेदीसाठी शेतकऱ्यांना बारदाना पुरविण्याच्या योजनेत २५ लाखांचा गैरव्यवहार केल्याप्रकरणी शहापूर प्रादेशिक कार्यालयातील एका कर्मचाऱ्याविरोधात गुन्हा दाखल झाला आहे. उपप्रादेशिक कार्यालयाच्या कर्मचाऱ्यांना या महामंडळाच्या व्यवस्थापकीय संचालक लीना बनसोड यांनी नोटिसा बजावल्या आहे.

धान खरेदी करताना संबंधित शेतकऱ्यांना महामंडळाकडून बारदाना दिला जातो. कोरोनात महामंडळाकडे बारदाना उपलब्ध नसल्याने खरेदी थांबू नये म्हणून शेतकऱ्यांकडूनच बारदाना खरेदीचा निर्णय घेण्यात आला होता. हे बारदाना २०२३-२४ मध्ये शेतकऱ्यांना परत करण्यात आले. तरीदेखील शहापूर उपप्रादेशिक कार्यालयांतर्गत किन्हवली केंद्रांकडून बारदाना न मिळाल्याच्या तक्रारी काही शेतकऱ्यांनी केल्या.

तक्रारींच्या अनुषंगाने शहानिशा केल्यानंतर शहापूर प्रादेशिक कार्यालयांतर्गत असलेल्या सहा केंद्रांवर ठरवून देण्यात आलेले बारदाना आणि तपासणीमध्ये आढळून आलेले बारदाना यांच्यात साधारण अडीच लाख बारदानाची तफावत आढळली. यावर महामंडळाचे व्यवस्थापकीय संचालक, व्यवस्थापक यांनी चौकशी समिती स्थापन केली.

संशयित प्रतवारीकार समाधानकारक उत्तरे देऊ शकले नाहीत. त्यामुळे व्यवस्थापकीय संचालकांच्या आदेशानुसार त्यांच्यावर गुन्हा दाखल करण्यात आला आहे. यामध्ये समावेश असलेल्या शासकीय व्यक्तींना देखील नोटिसा देण्यात आल्या आहेत. त्यांची देखील ठाणे ग्रामीण पोलिसांमार्फत चौकशी सुरू आहे.